BAKI,TurkicWorld,Yusif Şərifzadə
Yaxın Şərq üzrə ekspert Abbas Əslani ABŞ Prezidenti Donald Trampın Hörmüz boğazı üzərində “tam nəzarət” barədə açıqlamasının Vaşinqtonun danışıqları bərpa etmək səyləri ilə uyğun gəlmədiyini bildirib.
TurkicWorld xəbər verir ki, Tehranda yerləşən Yaxın Şərq Strateji Araşdırmalar Mərkəzinin baş elmi əməkdaşı Əslaninin sözlərinə görə, əgər ABŞ həqiqətən boğaz üzərində tam nəzarətə malikdirsə, onda danışıqlara ehtiyac qalmır.
Ekspert qeyd edib ki, Oman və İran Hörmüz boğazının gəmiçilik üçün yenidən açılması məqsədilə danışıqları davam etdirərkən, Trampın açıqlaması qlobal enerji bazarlarına sakitlik mesajı vermək cəhdi ola bilər.
Əslani bildirib ki, Tramp daha əvvəl İranı danışıqlar masasına qaytarmaq üçün iqtisadi təzyiq siyasətini davam etdirəcəyini açıqlayıb. Lakin hazırda həmin danışıqların əsas mövzularından biri də Hörmüz boğazının açılmasıdır.
Onun sözlərinə görə, İran ABŞ-dan ilk növbədə öz öhdəliklərini yerinə yetirməsini tələb edir. Tərəflərin mövqeləri arasında ciddi fərqlər qalır və Tehran əsasən vasitəçilər üzərindən fəaliyyət göstərir.
Əslani bildirib ki, İran Hörmüz boğazı məsələsinin ayrıca müzakirə olunmasını istəmir. Tehran məsələyə daha geniş yanaşaraq sanksiyaların aradan qaldırılmasını, neft satışına imkan yaradılmasını və müharibəyə son qoyulmasını tələb edir.
Ekspert qeyd edib ki, İranın yüksək rütbəli təhlükəsizlik rəsmisi Möhsün Rzainin açıqlamaları da müzakirələrin istiqamətinin “boğazın açılması” məsələsindən “müharibənin başa çatdırılması” məsələsinə dəyişdiyini göstərir.
