BAKI,TurkicWorld,Yusif Şərifzadə
İranın Pakistandakı səfiri Rza Əmiri Müqəddəm ABŞ-ı ötən ay imzalanmış İslamabad Anlaşma Memorandumunun şərtlərini pozmaqda və münaqişəni yenidən alovlandırmaqda ittiham edib.
TurkicWorld xəbər verir ki, İran diplomatının sosial şəbəkədə yaydığı açıqlamaya görə, ABŞ memorandumu onun müddəalarına zidd şəkildə şərh edərək döyüş meydanında əldə edə bilmədiyi məqsədlərə çatmaq üçün Hörmüz boğazının müəyyən hissələrinə nəzarəti ələ keçirib.
Müqəddəm bildirib ki, İran tərəfinin memorandumun belə birtərəfli və özbaşına şərhinə razı olmaması əvvəlcədən aydın idi. Onun sözlərinə görə, bu yanaşma tərəflər arasında imzalanmış razılaşmanın açıq şəkildə pozulması deməkdir.
İranlı diplomat iddia edib ki, ABŞ razılaşmanın şərtlərinə və beynəlxalq hüququn əsas prinsiplərinə zidd olaraq yenidən hərbi əməliyyatlara başlayıb və infrastruktur obyektlərinə zərbələr endirib.
Səfir beynəlxalq ictimaiyyəti Vaşinqtonun hərəkətlərini qətiyyətlə pisləməyə çağıraraq bunları "aqressiv və məsuliyyətsiz addımlar" kimi qiymətləndirib.
ABŞ tərəfi İran səfirinin ittihamlarına və memorandumun pozulması ilə bağlı iddialara hələlik rəsmi münasibət bildirməyib. Məlumat müstəqil mənbələr tərəfindən də təsdiqlənməyib.
