BAKI,TurkicWorld Orxan Qədirzadə
Pakistanın cənub-qərbində sərnişin avtobusunun dərəyə aşması nəticəsində azı 40 nəfər həyatını itirib, 8 nəfər isə müxtəlif dərəcəli xəsarətlər alıb.
Məlumata görə, qəza cümə günü səhər saatlarında Bəlucistan və Xeybər-Paxtunxva əyalətlərinin sərhədi yaxınlığındakı ucqar Dana Sar bölgəsində baş verib.
Bəlucistan hökumətinin sözçüsü Şahid Rind bildirib ki, idarəetmədən çıxan avtobus magistral yoldan çıxaraq qayalı dərəyə yuvarlanıb.
Onun sözlərinə görə, avtobusda yalnız öz sərnişinləri deyil, nasazlıq səbəbindən yolda qalan digər avtobusun sərnişinləri də daşınırdı. Bu səbəbdən nəqliyyat vasitəsində normadan artıq sərnişin olub.
Bəlucistanın baş naziri Sərfraz Buqti faciə ilə bağlı başsağlığı verərək, aidiyyəti qurumlara yaralıların ən yüksək səviyyədə tibbi yardımla təmin olunması barədə göstəriş verib.
Hazırda xilasedicilər həlak olanların şəxsiyyətinin müəyyənləşdirilməsi və yaralıların müalicəsi istiqamətində işləri davam etdirirlər.
Qeyd edək ki, Pakistanda yol qəzaları tez-tez baş verir. Buna əsas səbəblər kimi yolların texniki vəziyyətinin qənaətbəxş olmaması, yol hərəkəti qaydalarına nəzarətin zəifliyi və xüsusilə dağlıq ərazilərdə təhlükəli sürücülük halları göstərilir.
