BAKI,TurkicWorld,Yusif Şərifzadə
İran mənbələri ABŞ Prezidenti Donald Trampın İranla mümkün razılaşma barədə səsləndirdiyi fikirlərin reallığı tam əks etdirmədiyini iddia edirlər. Tehran tərəfi bəzi məqamların təhrif olunduğunu bildirir.
TurkicWorld xəbər verir ki, İranın yarı-rəsmi Fars Xəbər Agentliyi məlumatlı mənbələrə istinadən Donald Trampın Truth Social platformasında paylaşdığı son açıqlamaya münasibət bildirib.
Mənbələrin sözlərinə görə, Trampın təqdim etdiyi məlumatlar “həqiqət və yalanın qarışığı”ndan ibarətdir və danışıqlar zamanı müzakirə olunan bəzi əsas məsələləri düzgün əks etdirmir.
İddialara əsasən, İranın zənginləşdirilmiş nüvə materiallarının məhv ediləcəyi barədə səsləndirilən fikir hazırkı müzakirə olunan çərçivədə yer almır və bu səbəbdən “əsassız iddia” kimi qiymətləndirilir.
Eyni zamanda İran mənbələri Hörmüz boğazının tam və rüsumsuz şəkildə açılması ilə bağlı tələbin də hazırda müzakirə olunan layihə sənədində nəzərdə tutulmadığını bildiriblər.
Fars Xəbər Agentliyinin məlumatına görə, Tramp açıqlamasında sənəddə yer aldığı iddia olunan bəzi vacib məqamları qeyd etməyib. Bunlar arasında İranın xaricdə dondurulmuş aktivlərinin bir hissəsinin azad edilməsi və Livanda tam atəşkəsə dair müddəalar da göstərilir.
İran tərəfi vurğulayır ki, müzakirə olunan çərçivə sənədi hələ yekun razılaşma statusu daşımır və tərəflər arasında müxtəlif məsələlər üzrə fikir ayrılıqları qalmaqdadır.
Analitiklər hesab edirlər ki, Vaşinqton və Tehran tərəfindən verilən fərqli açıqlamalar danışıqlar prosesinin hələ də mürəkkəb mərhələdə olduğunu və yekun razılaşmanın əldə edilməsinin asan olmayacağını göstərir.
