BAKI, TurkicWorld, Orxan Qədirzadə
ABŞ-ın vitse-prezidenti Cey Di Vens Ukrayna ilə Rusiya arasında aparılan danışıqlarda ərazi məsələsi ilə bağlı mövqelərin daha aydın şəkildə formalaşdığını bildirib.
TurkicWorld -un məlumatına görə, Vens Böyük Britaniya mərkəzli UnHerd saytının yazarı Sohrab Ahmariyə verdiyi müsahibədə Rusiyanın Donetsk üzərində tam ərazi nəzarəti tələb etdiyini, Ukrayna tərəfinin isə bunu ciddi təhlükəsizlik riski kimi qiymətləndirdiyini deyib.
ABŞ-ın vitse-prezidenti iddia edib ki, Ukrayna nümayəndələri qapalı müzakirələrdə Donetski uzunmüddətli perspektivdə itirə biləcəklərini qəbul ediblər. Onun sözlərinə görə, ərazi güzəşti məsələsi danışıqlarda əsas gecikdirici amillərdən biri olaraq qalır.
Vens qeyd edib ki, Rusiya–Ukrayna münaqişəsi ilə bağlı aparılan müzakirələrdə tərəflərin açıq və qapalı mövqeləri daha dəqiq şəkildə müəyyənləşib. Bununla yanaşı, o, müəyyən irəliləyişin olduğunu, lakin sülhə nail olunacağına dair hələlik tam əminliyin olmadığını bildirib.
NATO ilə Rusiya arasında gərginliyin artdığı bir dövrdə ABŞ prezidenti Donald Trampın Avropa ilə bağlı açıqlamalarına toxunan Vens, Vaşinqtonun Avropa ittifaqını zəiflətmək niyyətində olmadığını vurğulayıb. O bildirib ki, ABŞ Avropadan daha çox özünə yetərli olmasını gözləyir.
ABŞ-ın vitse-prezidenti Avropada iqtisadi və mədəni durğunluq əlamətlərinin müşahidə edildiyini qeyd edərək, Vaşinqtonun daha güclü, daha özünəinamlı və daha dinamik Avropanın formalaşmasında maraqlı olduğunu bildirib.
