Bakı, TurkicWorld:
Tanınmış memar, inşaatçı, Azərbaycan Xalq Cümhuriyyətinin görkəmli dövlət xadimlərindən biri olmuş Məmməd Həsən Cəfərqulu oğlu Hacınski 1875-ci il 3 martda Bakıda anadan olub.
1902-ci ildə Peterburq Texnologiya İnstitutunu bitirib. 1908-ci ildə Bakı şəhər idarəsində tikinti şöbəsinə başçılıq edib, şəhərin baş planının layihəsini təkmilləşdirib. 1909-1910-cu illərdə Bakı dənizkənarı parkının salınması (tikintisi 1912-ci ildə başa çatdırılıb) və dəniz hamamının tikilməsi M.H.Hacınskinin fəaliyyəti ilə bağlıdır.
1912-ci ildə şəhər idarəsi M.H.Hacınskinin redaktəsi ilə Bakı küçələrinin abadlaşması haqqında kitab çap etdirib. O, 1913-cü ildə qısa müddətə Bakı şəhər idarəsinin rəisi olub, Şirvanşahlar sarayının qorunması və bərpasına dair təşəbbüs irəli sürüb. Həmin təşəbbüsə əsasən 1918-ci ildə memarlar Zivər bəy Əhmədbəyov və Ö.Abuyev Şirvanşahlar sarayının bərpa layihəsini hazırlamaq üçün elmi-tədqiqat işləri aparıblar.
M.H.Hacınski 1918-ci il mayın 27-də yaradılan Azərbaycan Milli Şurasının üzvü olub, Azərbaycanın İstiqlal bəyannaməsinin altında onun da imzası var. Daha sonra Azərbaycan parlamentinin üzvü olub, Əlimərdan bəy Topçubaşovun başçılığı ilə Paris sülh konfransında (1919-1920) iştirak edən nümayəndə heyətinin tərkibində yer alıb. 1920-ci il martın 30-da Xalq Cümhuriyyətinin hökuməti istefa verdikdə, parlament yeni hökumətin təşkilini ona tapşırıb. O isə hökumət kabinetini təşkil edə bilməyərək hakimiyyət böhranını daha da dərinləşdirib, aprelin ortalarında isə «Müsavat» partiyasından istefa verərək Azərbaycan kommunistlərinin sırasına qoşulub.
Xalq Cümhuriyyəti devrildikdən sonra Hacınski Azərbaycan SSR Ali Xalq Təsərrüfatı Şurasında, Zaqafqaziya Dövlət Plan Komitəsində müxtəlif rəhbər vəzifələrdə çalışıb. Azərbaycanın başqa görkəmli ictimai-siyasi xadimləri kimi o da represiyaya məruz qalıb. “Azərbaycan Milli Mərkəzinin” işi üzrə ittiham olunub, L.Beriyanın göstərişi ilə 1930-cu il dekabrın 3-də Tiflisdə həbs edilərək, ağır işgəncələrə məruz qalıb. 1931-ci il fevralın 9-da ağır həbsxana həyatına dözməyərək intihar edib.
Twitter: a_alieva_
