BAKI, TurkicWorld, Fərid Mikayılov
1936-cı ildə Sivasda doğulan Yavuz Bülənt Bakilər, ədəbiyyata erkən yaşlardan maraq göstərib. Ankara Universiteti Hüquq Fakültəsini bitirsə də, ömrünü yazı və poeziyaya həsr edib. Şairin əsərlərində Türk-İslam dəyərləri, milli kimlik, vətən sevgisi və türk dünyasının birliyi əsas mövzulardan olub.
Onun məşhur əsərləri arasında Harmandan Sesler, Duvak, Seninle, Türkistan Türkistan və digər kitabları xüsusi yer tutur. Xüsusən də Orta Asiya səfərlərindən sonra yazdığı əsərlər türk dünyası ədəbiyyatında mühüm iz qoyub.
Bakilər, sadəcə şair deyil, həm də milli kimliyi və mənəvi dəyərləri müdafiə edən fikir adamı kimi tanınıb. Onun şeirləri nəsillərə istiqamət göstərib, milli ruhun qorunmasında mühüm rol oynayıb.
Türkiyədə və Azərbaycan da daxil olmaqla türk respublikalarında şairin əsərləri geniş oxucu kütləsi qazanıb.
Türk ədəbiyyatının önəmli simalarından, şair, yazıçı və fikir adamı Yavuz Bülənt Bakilər 89 yaşında vəfat edib. Onun ölümü Türkiyə ictimaiyyətində, eləcə də türk dünyasında böyük kədər doğurub.
Onun vəfatı ilə bağlı Türkiyənin rəsmi qurumları və ədəbi çevrələr başsağlığı mesajları yayıb. Şairin vətən sevgisi ilə dolu misraları sosial şəbəkələrdə yenidən paylaşılaraq yad edilib. Ədəbiyyatçılar və oxucular Bakilərin türk dünyasının mədəniyyətinə qoyduğu irsi böyük ehtiramla qeyd edirlər.
Yavuz Bülent Bakilərin vəsiyyətində də milli ruh öz əksini tapıb. Onun ədəbi irsi, şeirləri və publisistik yazıları gələcək nəsillərə yol göstərəcək bir miras kimi dəyərləndirilir.
