BAKI,TurkicWorld Orxan Qədirzadə
Türkiyənin xarici işlər naziri Hakan Fidan rəsmi səfər çərçivəsində Cənubi Koreyanın paytaxtı Seulda bu ölkənin xarici işlər naziri Cho Hyun ilə görüşüb.
Diplomatik mənbələrin məlumatına görə, tərəflər ikitərəfli münasibətlərin hazırkı vəziyyətini və iki ölkə arasında əməkdaşlığın genişləndirilməsi perspektivlərini müzakirə ediblər.
Səfər çərçivəsində Hakan Fidan Seul şəhərində yerləşən Koreya Respublikasının Hərbi Memorialı kompleksini də ziyarət edərək abidə önünə əklil qoyub.
Görüş Türkiyə ilə Cənubi Koreya arasında enerji, nüvə texnologiyaları və yüksək texnologiyalar sahəsində tərəfdaşlığın sürətlə inkişaf etdiyi bir dövrdə baş tutub.
Bundan əvvəl Cənubi Koreyanın İnnovativ Kiçik Modul Reaktorların İnkişafı Agentliyi – i-SMRDA ilə Türkiyənin Nuclean şirkəti arasında strateji əməkdaşlıq sazişi imzalanıb.
Razılaşmaya əsasən, tərəflər Türkiyədə və region ölkələrində kiçik modul reaktor layihələrinin həyata keçirilməsi istiqamətində birgə fəaliyyət göstərəcək, yeni əməkdaşlıq imkanlarını qiymətləndirəcək və Türkiyə sənayesinin qlobal kiçik modul reaktor təchizat zəncirinə inteqrasiyasına dəstək verəcəklər.
Nuclean şirkətinin nümayəndələri bildiriblər ki, saziş Türkiyənin uzunmüddətli enerji strategiyası baxımından xüsusi əhəmiyyət daşıyır. Ankara 2050-ci ilədək ölkənin nüvə enerji gücünü 20 min meqavata çatdırmağı hədəfləyir.
Nuclean şirkətinin Direktorlar Şurasının üzvü Koray Tuncer qeyd edib ki, kiçik modul reaktorlar yüksək təhlükəsizlik səviyyəsi, çevik tətbiq imkanları və bərpa olunan enerji mənbələri ilə inteqrasiya potensialı sayəsində bu məqsədlərə nail olunmasında mühüm rol oynaya bilər.
i-SMRDA-nın prezidenti Han Gon Kim isə bildirib ki, Cənubi Koreya innovativ kiçik modul reaktor texnologiyasının hazırlanmasını 2028-ci ildə başa çatdırmağı planlaşdırır. Ölkə bu texnologiyanı 2030-cu illərdə qlobal bazara çıxarmağı hədəfləyir.
Onun sözlərinə görə, Türkiyənin inkişaf etmiş sənaye infrastrukturu və istehsal potensialı ölkəni kiçik modul reaktor texnologiyalarının inkişafı və yayılması üçün mühüm regional mərkəzə çevirə bilər.
