Bakı. TurkicWorld:
Türkiyə Xarici İşlər Nazirliyi Qərbi Trakyada türk qəbiristanlığına hücumu pisləyib.
TurkicWorld-un məlumatına görə, bu barədə Türkiyə XİN bəyanat yayımlayıb.
“Yunanıstan səlahiyyətlilərindən cinayətkarları tez bir zamanda yaxalayaraq məsuliyyətə cəlb etmələrini, layiq olduqları cəzanı almasını və hadisənin səbəblərini aydınlaşdırmasını gözləyirik” - deyə bəyanatda qeyd olunub.
Nazirlik qeyd edib ki, Avropada artan anti-islamizm çərçivəsində müsəlman qəbiristanlıqlarının belə hədəfə alınması ümumi bəşəri dəyərlərin müdafiəsi uğrunda mübarizənin vacibliyini nümayiş etdirir.
"Biz qonşumuz Yunanıstanı gələcəkdə oxşar hərəkətlərin qarşısını almaq və Qərbi Trakya Türk Azlığına dəstək olmaq üçün bu istiqamətdə lazımi tədbirlər görməyə çağırırıq” – deyə əlavə olunub.
Xatırladaq ki, Qərbi Trakyada Gümülcine yaxınlığındakı Narlıköydə türk qəbiristanlığına hücum edilib.
Naməlum şəxs və ya şəxslərin hücumu nəticəsində 20-yə yaxın məzar daşı zədələnib.
Hafiz Rufizoğlu
