Bakı. TurkicWorld:

Türkmənistan və Tacikistan müxtəlif sahələrdə 24 əməkdaşlıq sənədi imzalayıb.

TurkicWorld-un məlumatına görə, Türkmənistan Prezidenti Serdar Berdiməhəmmədov Tacikistana rəsmi səfər edib. Səfər zamanı hər iki ölkə prezidentləri əvvəlcə təkbətək, daha sonra rəsmi nümayəndə heyətlərinin iştirakı ilə görüşüblər.

Görüş zamanı Tacikistan və Türkmənistan liderləri iki ölkə arasında müxtəlif dövlətlərarası əlaqələri ətraflı müzakirə edib, beynəlxalq və regional gündəlikdəki aktual məsələlər ətrafında ətraflı fikir mübadiləsi aparıblar.

Ticarət-iqtisadi əməkdaşlıq məsələləri ətraflı müzakirə olunub, əlaqələrin bu aspektinin daha da inkişaf etdirilməsi üçün zəruri tədbirlərin görülməsi razılaşdırılıb.

Bu çərçivədə tərəflər sənaye əməkdaşlığı, enerji və kənd təsərrüfatı sektorları, nəqliyyat və kommunikasiya kimi əməkdaşlıq sahələrinə diqqət yetiriblər.

Rəsmi görüşlərdən sonra iki ölkənin dövlət başçıları Türkmənistanın Tacikistanın Hatlon bölgəsində tikəcəyi məktəbin təməlqoyma mərasimində onlayn şəkildə iştirak ediblər.

Türkmənistan Prezidenti Serdar Berdiməhəmmədov və Tacikistan Prezidenti Emoməli Rəhman Tacikistan Respublikası ilə Türkmənistan arasında strateji tərəfdaşlığın dərinləşdirilməsi haqqında bəyannamə imzalayıblar.