BAKI,TurkicWorld
Azərbaycan və Ermənistan dövlət sərhədinin delimitasiyası prosesinin Azərbaycan, Ermənistan və Gürcüstan sərhədlərinin kəsişdiyi nöqtədən başlayaraq şimaldan cənuba doğru aparılması barədə razılıq əldə olunub.
Trend-in tədbirdəki müxbirinin məlumatına görə, bunu Azərbaycanın xarici işlər naziri Ceyhun Bayramov "2026 Bakı İqlim Fəaliyyəti Həftəsi (BCAW 2026)" çərçivəsində jurnalistlərə açıqlamasında deyib.
Nazir bildirib ki, delimitasiya üzrə dövlət komissiyasında Azərbaycan tərəfinin nümayəndə heyətinin tərkibi dəyişməyib və komissiyaya Baş nazirin müavini Şahin Mustafayev rəhbərlik edir.
"Delimitasiya üzrə dövlət komissiyasında Azərbaycan tərəfindən tərkib dəyişməzdir. Komissiyaya Baş nazirin müavini Şahin Mustafayev rəhbərlik edir. Mütəmadi olaraq komissiyaların görüşləri keçirilir və müzakirələr aparılır. Ermənistanda da müvafiq komissiyaya Baş nazirin müavini rəhbərlik edir", - deyə C.Bayramov qeyd edib.
Onun sözlərinə görə, ötən dövr ərzində iki ölkənin komissiyaları arasında çoxsaylı görüşlər keçirilib, komissiyaların fəaliyyətini tənzimləyən bir sıra sənədlər həm Azərbaycanda, həm də Ermənistanda qəbul və təsdiq olunub.
"Ümumi sərhədimizin delimitasiyasının hansı istiqamətdən başlayaraq irəliləməsi ilə bağlı razılıq mövcuddur. İşlərin daha çətin olan şimal sərhədindən, Azərbaycan, Ermənistan və Gürcüstanın kəsişmə nöqtəsindən başlayaraq şimaldan cənuba doğru aparılması və irəliləməsi istiqamətində razılıq və qarşılıqlı anlaşma var", - deyə nazir bildirib.
C.Bayramov daha spesifik məsələlərin delimitasiya komissiyalarının işinin gedişində müzakirə olunacağını və həllinin gözlənildiyini vurğulayıb.
"Daha spesifik detallara gəldikdə, təbii ki, bütün məsələlər vaxtı və zamanı gəldikcə müzakirə olunacaq və onların da həll olunması gözlənilir. Daha spesifik məsələlər, o cümlədən bu və ya digər yaşayış məntəqələri ilə bağlı məsələlər delimitasiya komissiyasının işi çərçivəsində müzakirə ediləcək", - deyə o əlavə edib.
