Bakı. TurkicWorld:
Azərbaycanda Prezident seçkiləri ölkə qanunvericiliyinə uyğun keçirilib.
TurkicWorld xəbər verir ki, bunu beynəlxalq müşahidəçi, İordaniya Nümayəndələr Palatasının Komitəsinin sədri Qazi Altunibat Azərbaycanda növbədənkənar prezident seçkiləri ilə bağlı mətbuat konfransında deyib.
"Biz 14 seçki məntəqəsində seçkiləri müşahidə edən zaman insanların fikirlərini diqqətlə öyrəndik, prosesin gedişini yaxından izlədik. Vəziyyəti dərindən təhlil etdik və seçki qanunvericiliyinin pozulması hallarına rast gəlmədik", - o vurğulayıb.
Xatırladaq ki, ötən gün Azərbaycanda Prezident seçkiləri keçirilib. Prezident seçkilərində 7 nəfərin namizədliyi qeydə alınıb. Onlardan 5 nəfərin namizədliyi siyasi partiyalar tərəfindən, 2 nəfərin namizədliyi öz təşəbbüsü ilə irəli sürülüb.
Seçki məntəqələrinin 93,35 faizindən daxil olan məlumatlar əsasında prezident seçkilərinin ilkin nəticələrinə əsasən Yeni Azərbaycan Partiyasının prezidentliyə namizədi İlham Əliyev 92,05 faiz səslə liderdir.
Namizədliyi özü tərəfindən irəli sürülən Zahid Oruc səslərin 2,19 %, Milli Cəbhə Partiyasının prezidentliyə namizədi Razi Nurullayev 0,8% , Böyük Quruluş Partiyasının prezidentliyə namizədi Fazil Mustafa 2 % Böyük Azərbaycan Partiyasının prezidentliyə namizədi Elşad Musayev 0,67%, Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev 1,76% və namizədliyi özü tərəfindən irəli sürülən Fuad Əliyev isə səslərin 0,53 % toplayıb.
