BAKI,TurkicWorld Yusif Şərifzadə
Müharibənin qlobal iqtisadiyyata təsiri fonunda ABŞ-da dizel və yanacaq qiymətlərində ciddi artım müşahidə olunur.
TurkicWorld xəbər verir ki, xüsusilə nəqliyyat və logistika sektorunda yaranan problemlər gündəlik istehlak məhsullarının qiymətlərinə də təsir göstərməyə başlayıb.
ABŞ Prezidenti Donald Tramp əvvəlcə Hörmüz boğazında yaranan tədarük problemlərinin ölkə iqtisadiyyatına ciddi təsir etməyəcəyini bildirmişdi. O, ABŞ-ın neft ixrac edən ölkə olduğunu vurğulayaraq vəziyyətin nəzarət altında qalacağını qeyd etmişdi.
Lakin sonrakı proseslər ABŞ iqtisadiyyatında zəncirvari təsirlərin yarandığını göstərib. Xüsusilə supermarketlərə məhsul daşınmasında əsas yanacaq növü olan dizelin qiymətində kəskin artım qeydə alınıb.
Ekspertlər bildirirlər ki, nəqliyyat xərclərinin bahalaşması gündəlik ərzaq məhsullarının qiymətlərinə də birbaşa təsir edir və bu vəziyyət artıq ABŞ ictimaiyyəti tərəfindən hiss olunmağa başlayıb.
Donald Tramp isə müharibə başa çatdıqdan sonra vəziyyətin normallaşacağını israrla bəyan edir. Bununla belə, Ağ Ev hələlik prosesin nə qədər davam edəcəyi ilə bağlı konkret vaxt çərçivəsi açıqlamayıb.
Prezident əvvəlcə böhranın bir neçə gün davam edə biləcəyini desə də, daha sonra bunun həftələrlə uzana biləcəyini etiraf edib. Hazırda isə vəziyyət Vaşinqtonun atacağı növbəti addımlardan asılı olaraq qiymətləndirilir.
