Bakı,TurkicWorld
İspaniyanın Real Madrid klubu France Football jurnalının təşkil etdiyi və Avropa futbolunun ən nüfuzlu mükafatları kimi tanınan “Qızıl top” mükafatlandırma mərasimini boykot edib.
TurkicWorld xəbər verir ki, buna səbəb 2024-cü ilin mükafatlandırma mərasimində braziliyalı futbolçu Vinisius Juniora "ən yaxşı futbolçu" mükafatının verilməməsidir.
Klub rəhbərliyi bu səbəbdən mərasimdə iştirak etməyib.
"Əgər mükafatın meyarları Vinisiusu qalib elan etmirsə, eyni meyarlarla Karvaxalı qalib elan etməlidir. Belə olmadığı üçün “Qızıl top”un və UEFA-nın Real Madrid-ə hörmət etmədiyi göz qabağındadır. Real Madrid isə hörmət edilməyən yerə getməyəcək" ,- deyə klub rəhbərliyindən bildirilib.
Qeyd edək ki, "ən yaxşı futbolçu" mükafatını İspaniya millisinin və Mançester Sitinin yarımüdafiəçisi Rodri qazanıb. O, İspaniya millisi ilə Avropa Çempionatının qalibi olmuşdu.
