Bakı. TurkicWorld:
Qazaxıstan Respublikasının Prezidenti Kasım-Jomart Tokayev Macarıstanın Baş naziri Viktor Orbanı birinci dərəcəli “Dostuk” ordeni ilə təltif edib.
TurkicWorld-un məlumatına görə, Tokayev iki ölkə və xalq arasında sıx dostluq və qarşılıqlı faydalı əlaqələrin möhkəmləndirilməsində Viktor Orbanın müstəsna rolunu vurğulayıb.
"Cənab Viktor Orban, Sizi Qazaxıstanda görkəmli siyasi lider və dünya miqyasında böyük hörmət qazanmış dostumuz kimi yaxşı tanıyırlar. Bu baxımdan, sizin görkəmli liderlik bacarığınızı və Qazaxıstan-Macarıstan əlaqələrinin inkişafına verdiyiniz davamlı töhfəni yüksək qiymətləndirmək istərdim. Sizin yorulmaz səyləriniz və sarsılmaz şəxsi öhdəliyiniz sayəsində biz əməkdaşlığımızın gələcəyinə böyük nikbinliklə və yeni istəklərlə baxırıq”, - deyə Kasım-Jomart Tokayev bildirib.
Qeyd edək ki, bu gün Macarıstanın Baş naziri Viktor Orban Qazaxıstana rəsmi səfər edib.
Aytac Süleymanova
