Bakı. TurkicWorld
Qətərin Rabitə və İnformasiya Texnologiyaları Nazirliyi “Google Cloud” ilə əməkdaşlıq çərçivəsində süni intellekt, bulud hesablamaları və qabaqcıl rəqəmsal texnologiyalar üzrə bacarıqların inkişaf etdirilməsinə yönəlmiş milli təlim təşəbbüsünə başlayıb.
TurkicWorld xəbər verir ki, Qətər Rəqəmsal Akademiyası vasitəsilə həyata keçiriləcək təşəbbüs çərçivəsində 2030-cu ilədək 50 mindən çox təlim yerinin təqdim edilməsi nəzərdə tutulur. Proqram ölkədə rəqəmsal bacarıqların inkişaf etdirilməsinə və müasir texnologiyalardan istifadə edə bilən mütəxəssislərin hazırlanmasına yönəlib.
Təşəbbüs süni intellekt, bulud hesablamaları və digər qabaqcıl rəqəmsal texnologiyalardan istifadə üçün tələb olunan bilik və bacarıqların artırılmasını nəzərdə tutur. Əsas məqsədlərdən biri əmək qüvvəsinin rəqəmsal dəyişikliklərə və rəqəmsal iqtisadiyyatın tələblərinə uyğun hazırlanmasıdır.
Proqram ilkin rəqəmsal biliklərdən başlayaraq rəhbər şəxslər, texniki mütəxəssislər və proqram tərtibatçıları üçün ixtisaslaşdırılmış təlimlərədək geniş istiqamətləri əhatə edəcək. Bununla müxtəlif sahələrdə çalışan şəxslərin müasir texnologiyaları iş prosesinə daha səmərəli tətbiq etməsinə şərait yaradılması planlaşdırılır.
Nazirliyin rəqəmsal sənaye məsələləri üzrə nazir müavininin köməkçisi Rim Məhəmməd əl-Mənsuri bildirib ki, rəqəmsal imkanların genişləndirilməsi ölkənin rəqəmsal dəyişiklik prosesinin əsas istiqamətlərindən biridir. Onun sözlərinə görə, 50 mindən çox təlim imkanının yaradılması süni intellekt və bulud texnologiyalarından istifadə edə bilən geniş mütəxəssis bazasının formalaşdırılmasına xidmət edəcək.
Əl-Mənsuri qeyd edib ki, təşəbbüs “Rəqəmsal Gündəm 2030” çərçivəsində müəyyən edilmiş hədəflərlə də əlaqəlidir. Bu hədəflərə 2030-cu ilədək informasiya və rabitə texnologiyaları sahəsində təxminən 26 min iş yerinin yaradılması, eləcə də bu sahədə çalışan mütəxəssislərin imkanlarının qabaqcıl bacarıqlar vasitəsilə 10 faiz artırılması daxildir.
“Google Cloud”un bölgə üzrə baş direktoru Qassan Kosta isə son beş ildə Qətərdə 12 mindən çox insanın təlim keçdiyini bildirib. Onun sözlərinə görə, yeni əməkdaşlıq proqramı bu göstəricini əhəmiyyətli dərəcədə artıraraq 2030-cu ilədək 50 mindən çox təlim imkanının yaradılmasını nəzərdə tutur.
Təşəbbüs Qətərin Rabitə və İnformasiya Texnologiyaları Nazirliyi ilə “Google Cloud” arasında bağlanmış beşillik çərçivə sazişi əsasında həyata keçirilir. Proqram Dohadakı Qətər Milli Konqres Mərkəzində keçirilən “Google Cloud Summit Doha 2026” tədbiri zamanı elan olunub.
