Bakı. TurkicWorld
İran Prezidenti Məsud Pezeşkian BMT Baş Assambleyasındakı çıxışını ABŞ Prezidenti Donald Trampa müraciətlə yekunlaşdıraraq, sanksiyaların, təzyiqlərin və hədələrin İran xalqının müqavimətini daha da artıracağını bildirib. Pezeşkianın çıxışı Trampın bir gün əvvəl BMT kürsüsündən İrana qarşı sərt açıqlamalar səsləndirməsindən sonra baş tutub.
TurkicWorld xəbər verir ki, Pezeşkian İranın dialoq və danışıqlara açıq olduğunu, lakin güc və təzyiq dili ilə danışılmasını qəbul etməyəcəyini deyib. O, ölkəsinin təzyiqlər qarşısında geri çəkilməyəcəyini vurğulayıb. Pezeşkianın Nyu-York səfəri fonunda İran və ABŞ arasında diplomatik təmasların mümkünlüyü də müzakirə olunur.
İran Prezidenti çıxışında Fələstin məsələsinə də geniş yer ayırıb. O, Fələstini beynəlxalq ictimaiyyətin qarşısında həllini gözləyən əsas məsələlərdən biri, Qəzzanı isə mülki əhalinin iztirablarının qarşısının alınmasında beynəlxalq mexanizmlərin yetərsizliyinin göstəricisi kimi təqdim edib.
Pezeşkian bildirib ki, onilliklər ərzində Fələstinlə bağlı çoxsaylı qətnamələr qəbul edilməsinə baxmayaraq, işğal və zorakılıq davam edib. Onun fikrincə, dünyada işğal, təcavüz və ədalətsizlik davam etdiyi müddətdə müqavimət də mövcud olacaq.
İran Prezidenti Qəzzada geniş dağıntılara və insan itkilərinə baxmayaraq, Fələstin xalqının müqavimət iradəsinin aradan qalxmadığını bildirib. O, insanların öz torpaqlarından çıxarılması və evlərinin hücumlara məruz qalması şəraitində müqavimətin davam etməsinin təbii olduğunu söyləyib.
Pezeşkian sülhdən danışarkən Fələstin məsələsinin diqqətdən kənarda saxlanılmasının mümkün olmadığını vurğulayıb. İran rəhbərliyi uzun müddətdir Fələstin məsələsini Yaxın Şərq siyasətinin əsas istiqamətlərindən biri kimi təqdim edir.
Çıxış ABŞ-İran münasibətlərində gərginliyin davam etdiyi bir vaxtda səslənib. ABŞ Prezidenti Donald Tramp bir gün əvvəl BMT Baş Assambleyasındakı çıxışında İrana qarşı sərt mövqe nümayiş etdirməklə yanaşı, razılaşmanın əldə oluna biləcəyini də bildirib.
