BAKI,TurkicWorld
Misirdə sosial şəbəkələrdən istifadə edən uşaqların qorunması məqsədilə yeni yaş məhdudiyyətləri tətbiq olunub. Media Tənzimlənməsi üzrə Ali Şura və Milli Telekommunikasiya Tənzimləmə İdarəsinin birgə qərarına əsasən, sosial şəbəkələrdə 13 yaşdan kiçik uşaqlar üçün müstəqil şəxsi hesabların yaradılmasına və aktivləşdirilməsinə icazə verilməyəcək.
TurkicWorld xəbər verir ki, 13 yaşı tamam olmuş, lakin 15 yaşına çatmamış uşaqların sosial şəbəkələrdə hesab açmasına müəyyən şərtlərlə icazə veriləcək. Bu hesablar üçün təhlükəsiz rejim avtomatik və məcburi şəkildə aktivləşdirilməli, istifadəçi 15 yaşına çatanadək həmin rejimi özü söndürə bilməməlidir.
Yeni qaydalara əsasən, sosial şəbəkə platformaları istifadəçilərin yaşını müəyyənləşdirmək üçün səmərəli və mütənasib yoxlama mexanizmləri tətbiq etməlidir. Eyni zamanda, yaş məhdudiyyətlərinin yan keçilməsinin qarşısının alınması və yoxlama zamanı mümkün qədər az şəxsi məlumatın toplanması tələb olunur.
Platformalar mövcud hesabları da nəzərdən keçirməli, 15 yaşdan kiçik şəxslərə məxsus olduğu müəyyən edilən və ya buna əsaslı şübhə yaranan hesabları yeni qaydalara uyğunlaşdırmalıdır. Yaşın səhv müəyyən edildiyi hallarda istifadəçilər üçün etiraz və məlumatların düzəldilməsi mexanizmi də yaradılmalıdır.
Sosial şəbəkələr qərarın tələblərini üç ay ərzində həyata keçirməlidir. Bundan başqa, qərar barədə rəsmi bildiriş aldıqdan sonra 30 gün ərzində texniki və əməliyyat tədbirlərini, eləcə də icra müddətlərini əhatə edən fəaliyyət planı təqdim etmələri tələb olunur.
Qərar Misir Prezidenti Əbdülfəttah əs-Sisinin uşaqların və yeniyetmələrin sosial şəbəkələrdə üzləşə biləcəyi risklərdən qorunması istiqamətində tədbirlərin gücləndirilməsi ilə bağlı göstərişlərindən sonra qəbul edilib.
Media Tənzimlənməsi üzrə Ali Şuranın rəhbəri Xalid Əbdüləziz bildirib ki, məqsəd uşaqları texnologiyadan uzaqlaşdırmaq deyil, onların yaşlarına uyğun və daha təhlükəsiz rəqəmsal mühitdə fəaliyyət göstərməsini təmin etməkdir. O, zərərli məzmun, istismar, təhqir, təqib və şantaj kimi rəqəmsal risklərdən müdafiəni əsas prioritetlərdən biri kimi göstərib.
Milli Telekommunikasiya Tənzimləmə İdarəsinin rəhbəri Məhəmməd Şəmrux isə yeni sistemin yaşa və risk səviyyəsinə uyğun fərqli müdafiə mexanizmlərinin tətbiqinə əsaslandığını bildirib. Beləliklə, bütün istifadəçilərə eyni qaydaların tətbiqi əvəzinə, uşağın yaşından və qarşılaşa biləcəyi risklərdən asılı olaraq qoruma səviyyəsi müəyyən ediləcək.
Misir bundan əvvəl də uşaqların rəqəmsal təhlükəsizliyinin gücləndirilməsi istiqamətində addımlar atıb. 2026-cı ilin əvvəlində valideynlərə uşaqların internet istifadəsini məhdudlaşdırmağa imkan verən xüsusi mobil rabitə həllərinin tətbiqi üzərində iş aparıldığı açıqlanmışdı.
