BAKI,TurkicWorld,Yusif Şərifzadə
Qətər İnvestisiya Təşkilatı (QIA) süni intellekt üçün hesablama avadanlıqları hazırlayan Positron AI şirkətinin 875 milyon dollarlıq C seriyalı maliyyələşdirmə mərhələsində iştirak etdiyini açıqlayıb. Yeni sərmayə mərhələsi Positron AI-nin dəyərini 5 milyard dollara çatdırıb.
TurkicWorld xəbər verir ki, maliyyələşdirməyə NEA, Atreides Management, Valor Equity Partners, Andra Capital, həmçinin Silicon Graphics və Netscape şirkətlərinin qurucusu Cim Klark və digər sərmayəçilər rəhbərlik ediblər. Qətər İnvestisiya Təşkilatı 2026-cı ilin fevralında Positron AI-nin B seriyalı maliyyələşdirmə mərhələsində də iştirak etmişdi.
Positron AI əvvəlcədən öyrədilmiş süni intellekt modellərinin daha az xərc və enerji sərfiyyatı ilə işlədilməsi üçün xüsusi avadanlıq və proqram təminatı hazırlayır. Süni intellekt köməkçilərinə və avtonom sistemlərə tələbat artdıqca yaddaş tutumu, məlumat ötürmə sürəti və enerji tələbatı bu sahədə əsas texnoloji çətinliklərə çevrilir.
Şirkətin yaddaş imkanlarını ön plana çıxaran texnoloji quruluşu bu məhdudiyyətləri aradan qaldırmağa, yüksək ötürmə qabiliyyətli yaddaş və mürəkkəb çip istehsalı zəncirlərindən asılılığı azaltmağa yönəlib. Texnologiyanın həm hava, həm də maye ilə soyudulan məlumat mərkəzlərində istifadəsi nəzərdə tutulur.
Yeni maliyyələşdirmə Positron AI-nin növbəti nəsil texnologiyalarının hazırlanması və kommersiyalaşdırılmasına sərf ediləcək. Buraya şirkətin yeni nəsil “Asimov” çipinin istehsala hazırlıq mərhələsinin tamamlanması və çoxterabaytlıq yaddaşa malik “Titan” sisteminin kütləvi istehsalının genişləndirilməsi daxildir.
QIA bildirib ki, süni intellekt modellərinin işlədilməsi üçün hesablama infrastrukturu qlobal texnologiya sisteminin getdikcə daha mühüm hissəsinə çevrilir. Təşkilatın Positron AI-yə sərmayəsi süni intellektin növbəti inkişaf mərhələsinə töhfə verən və uzunmüddətli artım potensialına malik innovativ şirkətlərə dəstək strategiyasının davamıdır.
