BAKI,TurkicWorld,Yusif Şərifzadə
İsrailin Baş naziri Benyamin Netanyahunun ofisi Livanın cənubunda saxlanılmış beş Livan vətəndaşının azad edildiyini açıqlayıb. İsrail tərəfinin məlumatına görə, aparılan araşdırma nəticəsində həmin şəxslərin silahlı qruplaşmalarla əlaqəsinin olmadığı müəyyən edilib.
TurkicWorld xəbər verir ki, Netanyahunun ofisi beş Livan vətəndaşının yoxlamalardan sonra sərbəst buraxıldığını bildirib. Onların Livanın cənubunda İsrail qüvvələri tərəfindən saxlanıldığı qeyd olunub.
Açıqlamaya görə, araşdırmalar zamanı həmin şəxslərin silahlı qruplaşmalarla əlaqəsini təsdiqləyən məlumat aşkar edilməyib. Bundan sonra onların azad olunması barədə qərar qəbul edilib.
Netanyahunun ofisi qərarın İsrail ilə Livan arasında aparılan danışıqlar fonunda verildiyini də açıqlayıb.
Danışıqların əsas mövzularından birinin 1980-ci illərdə Livanda öldürülən yəhudi icmasının rəhbərlərinin qalıqlarının İsrailə qaytarılması olduğu bildirilib.
İsrail tərəfi beş livanlının azad edilməsinin həmin danışıqlarla eyni dövrə təsadüf etdiyini vurğulasa da, məhbusların buraxılması ilə qalıqların qaytarılması arasında birbaşa razılaşmanın olub-olmadığı barədə əlavə məlumat verməyib.
