BAKI,TurkicWorld,Yusif Şərifzadə
İsrailin Baş naziri Benyamin Netanyahu beynəlxalq etirazların artmasına baxmayaraq, işğal altındakı İordan çayının qərb sahilində İsrail yaşayış məntəqələrinin yaradılması və genişləndirilməsi siyasətinin davam etdiriləcəyini bildirib.
TurkicWorld xəbər verir ki, Netanyahu hökuməti son dövrdə İordan çayının qərb sahilində yeni yaşayış məntəqələrinin yaradılması və mövcud məntəqələrin genişləndirilməsi ilə bağlı çoxsaylı qərarlar qəbul edib.
Oktyabrda keçiriləcək seçkilər ərəfəsində Netanyahu ölkədəki ən sağ yönümlü hökumətlərdən birinə rəhbərlik edir. Onun hökuməti işğal altındakı ərazilərdə İsrail yaşayış məntəqələrinin tikintisini sürətləndirib.
Məlumata görə, ərazidə yaradılan bəzi kiçik yaşayış məntəqələri bir neçə daşınan evdən və ya müvəqqəti tikilidən ibarətdir. Bu cür məntəqələrin bir hissəsi həm beynəlxalq hüquqa, həm də İsrail qanunlarına zidd hesab olunur.
Bununla belə, son illərdə belə yaşayış məntəqələrinin İsrail hakimiyyəti tərəfindən təsdiqlənməsi və sonradan qanuniləşdirilməsi halları artıb.
“Rəqəmləri görməməzliyə vura bilmərik. Birlikdə yaratdığımız və qanuniləşdirdiyimiz 104 yaşayış məntəqəsi və 160 təsərrüfat var. Bunların sayı daha da artacaq”, – Netanyahu bildirib.
İsrailin yaşayış məntəqələrini genişləndirməsi beynəlxalq səviyyədə etirazlarla qarşılanır. Eyni zamanda, bölgədə israilli məskunlaşanların fələstinlilərə qarşı zorakılıq hallarının artdığı bildirilir.
Ötən həftə İsrail hakimiyyətinin 1 200-dən çox yeni evin tikintisi üçün təkliflərin qəbuluna başlamasından sonra bir sıra Avropa ölkələrinin rəhbərləri layihəni pisləyiblər.
Beynəlxalq ictimaiyyətin böyük hissəsi İordan çayının qərb sahilində İsrail yaşayış məntəqələrinin yaradılmasını beynəlxalq hüquqa zidd hesab edir və bu siyasətin gələcək Fələstin dövlətinin yaradılması imkanlarını zəiflətdiyini bildirir.
