BAKI,TurkicWorld,Yusif Şərifzadə
İran Hörmüz boğazından keçidlə bağlı müəyyən etdiyi qaydaları pozduğunu bildirdiyi 45 tankeri “qara siyahı”ya daxil edib. Tehran həmin gəmilərin gələcək keçidlərinə, eləcə də onlarla yük ötürülməsində iştirak edən digər gəmilərə qarşı tədbirlər görüləcəyini açıqlayıb.
TurkicWorld xəbər verir ki, İran tərəfi qərarın Hörmüz boğazında tətbiq etdiyi keçid qaydalarının pozulması ilə əlaqədar qəbul edildiyini bildirib.
Tehran “qara siyahı”ya daxil edilən tankerlərin gələcəkdə Hörmüz boğazından keçməyə cəhd göstərəcəyi halda onlara qarşı tədbir görüləcəyini bəyan edib.
İranın açıqlamasına görə, məhdudiyyətlər yalnız həmin 45 tankerlə kifayətlənməyəcək. “Qara siyahı”dakı gəmilərlə yük ötürülməsi əməliyyatlarında iştirak edən digər gəmilər də İranın tədbirləri ilə üzləşə bilər.
Tehran hələlik “qara siyahı”ya daxil etdiyi bütün tankerlərin adlarını və onların konkret olaraq hansı qaydaları pozduğunu açıqlamayıb.
İranın qərarı Hörmüz boğazı ətrafında gərginliyin davam etdiyi bir vaxtda verilib. Boğaz dünya enerji daşımaları üçün strateji əhəmiyyət daşıyan əsas dəniz yollarından biridir.
Açıqlama, eyni zamanda, ABŞ-nin İrana qarşı iqtisadi təzyiqləri daha da sərtləşdirməyə hazırlaşdığı vaxta təsadüf edir. Vaşinqton Tehrana qarşı “tarixin ən sərt sanksiyaları”nı tətbiq edəcəyini bildirir.
Beləliklə, ABŞ-nin İranın enerji və ticarət əlaqələrini məhdudlaşdırmaq cəhdləri ilə Tehranın Hörmüz boğazından keçən gəmilərə qarşı tədbirləri eyni vaxtda sərtləşir. Bu vəziyyət boğazda kommersiya gəmiçiliyi və enerji daşımalarının təhlükəsizliyi ilə bağlı narahatlığı artırır.
