BAKI,TurkicWorld
Şimali Koreya lideri Kim Çen In Rusiya Prezidenti Vladimir Putinə göndərdiyi məktubda iki ölkə arasındakı münasibətlərlə fəxr etdiyini bildirib.
Bu barədə bazar günü Pxenyanın rəsmi KCNA agentliyi məlumat yayıb.
KCNA-nın məlumatına görə, Kim Çen In məktubunda "Sizinlə birlikdə KXDR-Rusiya münasibətlərini inkişaf etdirərək, ortaq mübarizə tariximizi davam etdirən ikitərəfli əlaqələrin daha da parlaq gələcəyini görməkdən hər zaman qürur duyuram" deyə bildirib.
Şimali Koreya lideri həmçinin Rusiya-Ukrayna münaqişəsində Moskvaya dəstəyini bir daha təsdiqləyərək, Vladimir Putinin "müdrik rəhbərliyi" altında Rusiyanın qalib gələcəyinə əmin olduğunu ifadə edib.
Vladimir Putin isə cümə günü Koreyanın Yaponiya işğalından azad edilməsinin 81-ci ildönümü münasibətilə Kim Çen Ina təbrik məktubu göndərmişdi. O, həmin məktubda iki ölkə arasında münasibətlərin "hərtərəfli strateji tərəfdaşlığın görünməmiş yüksək səviyyəsinə" çatdığını vurğulayıb.
Xatırladaq ki, Ukrayna Prezidenti Volodimir Zelenski bu yaxınlarda Şimali Koreyanı Rusiya qüvvələrinə dəstək məqsədilə əlavə 30-50 min hərbçi göndərməyə hazırlaşmaqda ittiham edib.
Zelenski həmçinin bildirib ki, Rusiya Şimali Koreya istehsalı olan ballistik raketlərlə zərbələr endirib və Cənubi Koreyanı, xüsusilə hava hücumundan müdafiə sistemləri sahəsində Kiyevlə əməkdaşlığa çağırıb. Seul isə hələlik bu çağırışa münasibət bildirməyib
