BAKI,TurkicWorld,Yusif Şərifzadə
İraq təhlükəsizlik məsələlərini və ortaq maraq doğuran mövzuları müzakirə etmək üçün Səudiyyə Ərəbistanına yüksək səviyyəli nümayəndə heyəti göndərməyi planlaşdırır.
TurkicWorld xəbər verir ki, İraqın dövlət xəbər agentliyinin məlumatına görə, nümayəndə heyətinin səfəri cümə axşamı günü baş tutacaq.
Heyətə Silahlı Qüvvələrin Ali Baş Komandanının Aparatının rəhbəri, Kəşfiyyat Xidmətinin rəhbəri, Hava Hücumundan Müdafiə Komandanlığının komandanı və Terrorla Mübarizə Xidmətinin rəhbəri daxil olacaq.
Bildirilib ki, danışıqlar zamanı Səudiyyə Ərəbistanına qarşı son hücumlar, eləcə də iki ölkə arasında təhlükəsizlik əməkdaşlığının gücləndirilməsi məsələləri müzakirə ediləcək.
Səfər İraq Baş naziri Əli əz-Zeydinin Səudiyyə Ərəbistanının Kəşfiyyat Xidmətinin rəhbəri Xalid əl-Humeydanla regional təhlükəsizlik məsələlərini müzakirə etməsindən bir neçə gün sonra həyata keçirilir.
Əli əz-Zeydi bildirib ki, İraq ərazisinin digər ölkələrə qarşı hücumların həyata keçirilməsi üçün istifadəsinə icazə verilməyəcək.
Ötən ay Səudiyyə Ərəbistanı İranla əlaqəli qüvvələrin ölkənin enerji infrastrukturuna hücumunun İraq ərazisindən həyata keçirildiyini iddia etmişdi. Bundan sonra ABŞ və Səudiyyə Ərəbistanı İraqdakı bəzi hədəflərə birgə zərbələr endirmişdi.
