BAKI,TurkicWorld,Yusif Şərifzadə
Oman hökuməti ölkə sahilləri yaxınlığında zədələnmiş tankerdən sızan neftin təxminən 390 kvadratkilometr ərazini əhatə etdiyini açıqlayıb. Gəminin sanksiyalar altında olduğu və Rusiya xam nefti daşıdığı bildirilir.
TurkicWorld xəbər verir ki, Oman Ətraf Mühit İdarəsi ölkənin cənubundakı Zofar bölgəsi yaxınlığında yerləşən Həllaniyyat adaları ətrafında "Karolin Bezengi" tankerindən sızan neftin qarşısının alınması üçün tədbirlər görüldüyünü bildirib.
Məlumata görə, neft ləkəsi adaların şimal-şərqindən Oman sahillərinə doğru yayılıb. Çirklənmiş ərazinin sahilə ən yaxın hissəsinin qurudan təxminən 7 kilometr məsafədə olduğu bildirilir.
Dəniz təhlükəsizliyi mənbələrinin məlumatına görə, gəmi heyəti ilk dəfə iyunun 8-də Yəmənin cənubundakı Əl-Mükəlla limanı yaxınlığında problemlə üzləşdiklərini bildirib.
İlkin qiymətləndirmələr gəminin göyərtəsində partlayışın baş verdiyini göstərib. Bununla belə, tankerə dəyən zərərin dəqiq səbəbi hələ müəyyənləşdirilməyib.
Oman hakimiyyəti də gəminin hansı səbəbdən zədələndiyinə dair açıqlama verməyib.
Gəmiçilik məlumatlarına əsasən, tanker səfərə başlamazdan əvvəl Rusiya mənşəli xam neftlə yüklənib. Gəminin açıq izləmə sistemi vasitəsilə son siqnalı iyunun 11-də Yəmən sahilləri yaxınlığında qeydə alınıb.
Oman hakimiyyəti hazırda neft sızmasının yayılmasının qarşısının alınması və ətraf mühitə mümkün təsirlərinin azaldılması istiqamətində tədbirlər görür.
