BAKI,TurkicWorld,Yusif Şərifzadə
Livanın cənubunda İsrail ordusunun yaşayış məntəqələrində evləri və mülki infrastrukturu dağıtmağa davam etdiyi bildirilir.
TurkicWorld xəbər verir ki, bölgədən verilən məlumatlara əsasən, İsrailin nəzarətində olan mövqelərə yaxın ərazilərdə bir neçə saat ərzində ardıcıl partlayış səsləri eşidilib.
Məlumata görə, İsrail qüvvələri yaşayış məntəqələrində söküntü işlərini davam etdirir və mülki tikililər dağıdılır.
Livanın cənubundakı Həddatə yaşayış məntəqəsində bir sıra evlərin yandırıldığı da bildirilir.
Yayılan məlumatlarda peyk görüntülərinin Livanın cənubunda genişmiqyaslı dağıntıları əks etdirdiyi və zərərin ölkə ərazisinin təxminən 6 faizini əhatə etdiyi iddia olunur.
Bildirildiyinə görə, dağıdılan evlərin bir hissəsi atəşkəs qüvvədə olduğu dövrdə məhv edilib.
Məlumatlarda qeyd olunur ki, 2024-cü ilin noyabrında əldə edilmiş atəşkəsdən sonra və 2026-cı ilin martında gərginliyin yenidən artmasına qədər də bölgədə hər gün söküntü işlərinin aparıldığı iddia edilir.
İsrail tərəfi bu iddialarla bağlı hələlik rəsmi açıqlama verməyib və məlumatlar müstəqil mənbələr tərəfindən tam təsdiqlənməyib.
