BAKI,TurkicWorld,Yusif Şərifzadə
ABŞ Prezidenti Donald Tramp Şimali Dakota ştatında keçirilən Teodor Ruzvelt Prezident Kitabxanasının açılış mərasimində çıxışı zamanı Hörmüz boğazındakı gəmi hərəkəti ilə bağlı açıqlama verib. O bildirib ki, son dövrdə boğazı tərk edən gəmilərin sayı rekord həddə çatıb.
TurkicWorld xəbər verir ki, Donald Tramp çıxışı zamanı Hörmüz boğazından ayrılan gəmilərin sayının indiyədək qeydə alınan ən yüksək göstəricilərdən birinə çatdığını söyləyib. Bununla yanaşı, o, kommunizmi dünyanın üzləşdiyi ən böyük təhlükələrdən biri adlandırıb.
Trampın çıxışı Teodor Ruzvelt Prezident Kitabxanasının açılış mərasimi çərçivəsində baş tutub. Tədbirdə tarixi hərbi geyimlərdə iştirak edən nümayəndələr də yer alıblar.
ABŞ Prezidenti Hörmüz boğazındakı vəziyyətlə bağlı əlavə təfərrüatlar açıqlamayıb. Bununla belə, onun bəyanatı bölgədə davam edən geosiyasi gərginlik fonunda diqqət çəkib.
Hörmüz boğazı dünya üzrə neft və mayeləşdirilmiş təbii qaz daşımalarının mühüm hissəsinin həyata keçirildiyi əsas dəniz keçidlərindən biri hesab olunur.
