BAKI,TurkicWorld,Yusif Şərifzadə
İranın Mərkəzi Hərbi Qərargahı İsrailin Livanın cənubuna endirdiyi hücumlara cavab olaraq Hörmüz boğazının gəmi hərəkəti üçün bağlandığını açıqlayıb.
TurkicWorld xəbər verir ki, dövlət televiziyası tərəfindən yayımlanan bəyanatda bu addımın İsrailin Livandakı hücumları və ABŞ ilə İran arasında əldə olunmuş razılaşmanın pozulması kimi qiymətləndirilən hadisələrə cavab olduğu bildirilib.
Mərkəzi Hərbi Qərargahın açıqlamasında qeyd olunub ki, Hörmüz boğazında gəmi hərəkəti dayandırılır və bu qərar qarşı tərəfin öhdəliklərini yerinə yetirməməsinə cavab olaraq qəbul edilib.
Bəyanatda vurğulanıb ki, bu addım ilkin tədbir xarakteri daşıyır və hücumlar davam edərsə, əlavə tədbirlər görülə bilər.
İran tərəfi bildirib ki, məqsəd qarşı tərəfi üzərinə götürdüyü öhdəliklərə əməl etməyə məcbur etməkdir.
Hörmüz boğazı dünya enerji daşımalarının mühüm hissəsinin keçdiyi strateji su yolu hesab olunur və burada baş verən hər hansı məhdudiyyət beynəlxalq enerji bazarlarına ciddi təsir göstərə bilər.
