BAKI,TurkicWorld,Yusif Şərifzadə
Livanın cənubunda yerləşən Nəbatiyə şəhəri son günlər İsrail-Livan qarşıdurmaları ilə bağlı xəbərlərdə ən çox hallanan məntəqələrdən birinə çevrilib.
TurkicWorld xəbər verir ki, Nəbatiyə Livanın cənubunda yerləşən ən böyük və ən mühüm şəhərlərdən biri hesab olunur.
Şəhərin strateji əhəmiyyəti ilk növbədə onun coğrafi mövqeyi ilə bağlıdır. Nəbatiyə cənub bölgələrini Livanın dağlıq və daxili rayonları ilə birləşdirən əsas nəqliyyat marşrutlarının üzərində yerləşir. Bu xüsusiyyət şəhəri həm mülki, həm də hərbi logistika baxımından vacib mərkəzə çevirir.
Nəbatiyə eyni zamanda Livanın cənubunda mühüm iqtisadi mərkəz kimi tanınır. Şəhər uzun illərdir ticarət, xidmət və yerli idarəetmə baxımından bölgənin əsas mərkəzlərindən biri hesab edilir.
Siyasi baxımdan da şəhərin xüsusi çəkisi var. Nəbatiyə əsasən şiə əhalinin yaşadığı bölgələrdən biridir və Hizbullahın sosial və siyasi təsirinin güclü olduğu ərazilər sırasında göstərilir.
Məhz bu səbəbdən İsrail və Hizbullah arasında baş verən qarşıdurmalar zamanı şəhər tez-tez diqqət mərkəzinə düşür. İsrail tərəfi müxtəlif vaxtlarda Nəbatiyə və ətraf bölgələri Hizbullahın logistika, əlaqələndirmə və komanda fəaliyyətləri ilə əlaqələndirib.
Bununla yanaşı, Nəbatiyə Livanın cənubunda yaşayan yüz minlərlə insan üçün inzibati, iqtisadi və sosial xidmətlərin təqdim olunduğu əsas şəhərlərdən biridir. Şəhərdə baş verən hər hansı hadisə yalnız hərbi deyil, həm də humanitar və iqtisadi nəticələr doğura bilir.
Mütəxəssislərin fikrincə, Nəbatiyəyə nəzarət və ya şəhərin ətrafında baş verən hadisələr Livanın cənubundakı ümumi vəziyyətə birbaşa təsir göstərdiyi üçün şəhər regionun "açar nöqtələrindən" biri hesab olunur.
