BAKI,TurkicWorld,Yusif Şərifzadə
Livan rəhbərliyi ölkənin cənubunda davam edən gərginlik fonunda təhlükəsizlik vəziyyətini və qarşıdakı diplomatik təmasları müzakirə edib.
TurkicWorld xəbər verir ki, Livan Prezidenti Cozef Aun Baş nazir Nəvaf Salam ilə keçirdiyi görüşdə ölkədəki ümumi vəziyyəti və xüsusilə cənub bölgələrindəki təhlükəsizlik məsələlərini nəzərdən keçirib.
Livan Prezident Administrasiyasının yaydığı məlumata görə, müzakirələr zamanı İsrailin davam edən hücumları, mülki əhali üçün yaranan təhlükələr, eləcə də insanların evlərini və dolanışıq mənbələrini tərk etmələrinə səbəb olan vəziyyət diqqət mərkəzində olub.
Tərəflər xüsusilə Sur (Tir) və Nəbatiyə bölgələrində müşahidə olunan təhlükəsizlik inkişaflarını ətraflı qiymətləndiriblər.
Görüş zamanı Vaşinqtonda Livan, ABŞ və İsrail hərbi nümayəndə heyətləri arasında keçirilən son danışıqların nəticələri də müzakirə olunub. Livan tərəfinin həmin görüşdə əsas məqsəd kimi atəşkəsin təmin edilməsini ön plana çıxardığı bildirilib.
Prezident və baş nazir eyni zamanda iyunun 2-3-də İsraillə keçirilməsi planlaşdırılan növbəti danışıqlar mərhələsinə hazırlıq məsələlərini də nəzərdən keçiriblər.
Müşahidəçilərin fikrincə, görüş Livanın cənubunda hərbi əməliyyatların davam etdiyi və diplomatik həll yollarının axtarıldığı həssas bir mərhələdə baş tutub.
