BAKI,TurkicWorld,Yusif Şərifzadə
“Global Sumud Flotilla” təşkilatçıları İsrail tərəfindən saxlanıldıqdan sonra azad edilən bəzi fəalların zorakılıq, pis rəftar və hüquqi təminatlardan məhrum edilmə ilə bağlı ciddi iddialar səsləndirdiyini bildiriblər. Hazırda bu məlumatlar müstəqil şəkildə təsdiqlənməyib və hüquqi araşdırma mərhələsində qiymətləndirilir.
TurkicWorld xəbər verir ki, yayılan məlumatlara əsasən, təşkilatçılar bəzi fəalların saxlanılma prosesində müxtəlif hüquq pozuntuları ilə üzləşdiyini iddia edirlər. Bildirilir ki, bəzi şəxslər xəstəxanaya yerləşdirilib, bir qrup fəal isə müxtəlif zorakılıq halları ilə bağlı iddialar irəli sürüb. Təşkilatçılar ümumilikdə fiziki zorakılıq və ağır rəftar hallarının baş verdiyini bildirirlər.
Məlumata görə, italiyalı iqtisadçı Luka Poqgi “Reuters”ə açıqlamasında saxlanılma müddətində pis rəftar və hüquqi müdafiə imkanlarının məhdudlaşdırılması ilə bağlı iddialar səsləndirib.
Hazırda İsrail tərəfinin bu məsələyə dair yekun və rəsmi qiymətləndirməsi ilə bağlı geniş açıqlama verilmədiyi bildirilir. Eyni zamanda məlumatlarda qeyd olunur ki, İtaliya prokurorluğu mümkün hüquqi pozuntular və cinayət xarakterli iddialarla bağlı araşdırmalara başlayıb.
Məsələ ilə bağlı yekun nəticələrin hüquqi və müstəqil istintaq proseslərinin tamamlanmasından sonra müəyyən ediləcəyi qeyd olunur.
