BAKI, TurkicWorld, Orxan Qədirzadə
ABŞ-ın Federal Təhqiqat Bürosu (FTB) "Within Our Lifetime" təşkilatının həmtəsisçisi, fələstinli fəal Nərdin Kisvaniyə qarşı planlaşdırılan sui-qəsd cəhdini ifşa edib.
TurkicWorld xəbər verir ki, FTB-nin Terrorla Mübarizə üzrə Birgə İşçi Qrupu Nyu-Cersi ştatının Hoboken şəhərində keçirdiyi xüsusi əməliyyat nəticəsində sui-qəsd planını vaxtında müəyyən edərək qarşısını alıb. Hadisə ilə bağlı 26 yaşlı Aleksandr Hayflerə qarşı partlayıcı qurğuların hazırlanması və saxlanması ittihamı irəli sürülüb. İstintaq materiallarına əsasən, şübhəli şəxs fəalın evinə "Molotov kokteyli" ilə hücum etməyi planlaşdırıb.
İttiham sənədlərində qeyd olunur ki, gizli fəaliyyət göstərən təhlükəsizlik əməkdaşı şübhəli şəxsin hazırlıq prosesinə daxil ola bilib. Axtarış zamanı Hayflerin mənzilində hücum üçün hazırlanmış 8 ədəd yandırıcı şüşə butulka aşkar edilib. Cinayət planı ilə əlaqədar daha bir nəfərin də saxlanıldığı bildirilir.
Nərdin Kisvani hadisədən sonra verdiyi açıqlamada ona qarşı yönəlmiş təhdidlərin bəzi siyasi dairələr və radikal təşkilatların çağırışlarından sonra artdığını qeyd edib. O, bir müfəttiş tərəfindən hədəf göstərildiyini və fiziki təzyiqlərə məruz qaldığını iddia edərək, hüquqi müstəvidə mübarizəsini davam etdirəcəyini vurğulayıb. ABŞ-İslam Münasibətləri Şurası (CAIR) hadisəni pisləyərək, nifrət cinayətlərinə qarşı şəffaf təhqiqatın aparılmasını tələb edib.
