BAKI, TurkicWorld, Orxan Qədirzadə
Səudiyyə Ərəbistanı, İran və Çin çərşənbə axşamı Tehranda keçirilən görüşdə Pekin Sazişinin tam şəkildə icrasına sadiq olduqlarını bəyan ediblər.
TurkicWorld xəbər verir ki, görüş üç ölkə arasında yaradılmış Birgə Üçtərəfli Komitənin üçüncü iclası çərçivəsində baş tutub.
İclasa Səudiyyə Ərəbistanının xarici işlər nazirinin müavini Valid əl-Xureyci qatılıb. Tərəflər BMT Nizamnaməsinə, İslam Əməkdaşlıq Təşkilatının Nizamnaməsinə və beynəlxalq hüquqa uyğun olaraq yaxşı qonşuluq münasibətlərinin gücləndirilməsi istiqamətində əməkdaşlığı davam etdirmək niyyətlərini vurğulayıblar.
Səudiyyə Ərəbistanı və İran Çin tərəfindən göstərilən müsbət rolu və Pekin Sazişinin icrasına davamlı dəstəyi yüksək qiymətləndiriblər. Çin tərəfi də öz növbəsində iki ölkə arasında müxtəlif sahələrdə münasibətlərin inkişafına dəstək verməyə hazır olduğunu bildirib.
Üç ölkə Səudiyyə–İran münasibətlərində əldə olunan irəliləyişi və bunun regional səviyyədə yaratdığı imkanları müsbət qiymətləndirib.
Görüşdə həmçinin Fələstin, Livan və Suriyada İsrailin hərbi əməliyyatlarının dərhal dayandırılması çağırışı edilib. Tərəflər İranın ərazi bütövlüyünə qarşı yönəlmiş istənilən hücumu pislədiklərini bildiriblər.
