Bakı,TurkicWorld
Mozambikdə oktyabr ayında keçirilmiş mübahisəli prezident seçkilərinin nəticələrindən sonra baş qaldıran üsyanlar zamanı Maputo yaxınlığında yerləşən həbsxanada 33 məhbus ölüb, 15 nəfər isə yaralanıb.
TurkicWorld xəbər verir ki, Milli Polis rəisi Bernardino Rafael bildirib ki, paytaxtdan təxminən 15 kilometr aralıda yerləşən həbsxanadan ümumilikdə 1534 məhbus qaçıb.
Onlardan 150-yə yaxını ordu ilə birgə keçirilən axtarış əməliyyatı zamanı tutulub.
Hadisələr zamanı həbsxanadan qaçmağa cəhd edən məhbuslar və həbsxana işçiləri arasında qarşıdurma yaşanıb. Üsyan zamanı həyatını itirənlər məhz bu toqquşma nəticəsində ölüblər.
Ədliyyə naziri Helena Kida yerli mediaya açıqlamasında bildirib ki, həbsxana üsyanı çöldəki etirazlarla əlaqəli deyil və hadisələr yalnız həbsxana daxilində başlamışdır. Lakin polis rəisi Rafael həbsxana qarşısında keçirilən etirazları üsyana təkan verməkdə ittiham edib.
Üsyan, məhkəmənin hakim partiyanın namizədi Daniel Çaponun qələbəsini təsdiqləməsindən bir gün sonra baş verib. Frelimo partiyası səslərin 65%-ni toplasa da, məğlub olan namizəd Venansio Mondlane seçkilərdə saxtakarlıq olduğunu iddia edib və bu, geniş yayılmış zorakılıqlara səbəb olub.
Sosial mediada yayılan görüntülərdə nümayişçilərin paytaxtda və Beyra şəhərində mağazaları qarət etdikləri, bəzi yerlərdə isə dükkanları yandırdıqları müşahidə olunub.
Qeyd edək ki, Mozambikdə 34 milyonluq əhali arasında seçkilərdən sonra gərginlik davam edir. Xüsusilə Mondlane-nin gənc tərəfdarları küçələrdə nümayişlər keçirir və təhlükəsizlik qüvvələrinin sərt müdaxiləsi ilə qarşılaşırlar.
