BAKI,TurkicWorld
Baykar şirkətinin hazırladığı pilotsuz platformalar “Ateş Serbest-2026” təlimində pilotsuz sürü əməliyyatından hədəflərin aşkarlanması və dəqiq zərbələrə qədər müxtəlif imkanlarını nümayiş etdirib.
TurkicWorld xəbər verir ki, Ankara və Polatlıda keçirilən təlimdə “AKINCI” və “Bayraktar TB2” pilotsuz uçuş aparatları, K2 kamikadze PUA-sı, “SİVRİSİNEK” dolanan sursatı, “Bayraktar KALKAN” DİHA-sı və süni intellekt əsaslı “KEMANKEŞ 1” mini qanadlı raketi iştirak edib.
Təlimdə havaya qalxan beş K2 kamikadze PUA-sı yerüstü idarəetmə məntəqəsi ilə əlaqə vasitəsilə 20 “SİVRİSİNEK” sursatından ibarət sürünün idarə və koordinasiyasını təmin edib. Sürü əməliyyatı zamanı qrupdan ayrılan 10 sursat müəyyən edilmiş hədəflərə salvo şəklində dalış edərək onları dəqiq vurub.
“Bayraktar KALKAN” DİHA-sı Baykar tərəfindən hazırlanmış və ilk dəfə istifadə olunan BG-180 3E üçoxlu sabitləşdirmə sistemli elektro-optik qurğu ilə hədəfləri aşkarlayıb, izləyib və nəzarətdə saxlayıb.
Türkiyə Silahlı Qüvvələrinin inventarında olan iki “AKINCI”dan biri TEBER, TOLUN, MAM-L TV və MAM-T sursatları ilə müəyyən edilmiş hədəfləri vurub. Çorludan havaya qalxan digər “AKINCI” isə MURAD AESA radarı vasitəsilə hava və yer hədəflərini aşkarlayıb.
Türkiyə Silahlı Qüvvələrinin inventarındakı “Bayraktar TB2”dən buraxılan “KEMANKEŞ 1” də hədəfini vurub. “AKINCI” və “Bayraktar TB2” təlimdə salamlaşma uçuşu da həyata keçirib.
Baykar bildirib ki, platformaların icra etdiyi tapşırıqlar şəbəkə mərkəzli döyüş şəraitində eyni vaxtda və əlaqələndirilmiş idarəetmə, avtonom sürü əməliyyatı, hədəflərin aşkarlanması və dəqiq zərbə imkanlarını nümayiş etdirib.
