BAKI,TurkicWorld
Türkiyə müdafiə sənayesi Azərbaycanın paytaxtı Bakıda keçiriləcək 6-cı Azərbaycan Beynəlxalq Müdafiə Sənayesi Sərgisi ADEX 2026-da 61 şirkətlə təmsil olunacaq.
TurkicWorld xəbər verir ki, Türkiyə Respublikasının Müdafiə Sənayesi Baş İdarəsinin koordinasiyası ilə həyata keçirilən iştirak çərçivəsində Türkiyə ADEX tarixinin ən geniş milli pavilyonu ilə sərgidə yer alacaq və ən çox iştirak edən ölkə olacaq.
Bakı Ekspo Mərkəzində keçiriləcək sərgidə Türkiyənin müdafiə sənayesinin aparıcı müəssisələri öz məhsullarını, texnologiyalarını və istehsal imkanlarını nümayiş etdirəcəklər.
Müdafiə Sənayesi Baş İdarəsinin rəhbərliyi, Müdafiə və Aviasiya Sənayesi İxracatçıları Birliyinin dəstəyi və “Roketsan” şirkətinin baş sponsorluğu ilə yaradılan milli pavilyonda “Aselsan”, “Türk Aerokosmik Sənayesi”, “Baykar” və “Havelsan” daxil olmaqla bir sıra qabaqcıl şirkətlər iştirak edəcək.
Türkiyə Müdafiə Sənayesi Baş İdarəsinin rəhbəri professor Haluk Görgün ADEX 2026-da Türkiyənin iştirakı ilə bağlı bildirib ki, 61 şirkətlə iştirak ölkənin sərgi tarixində ən geniş təmsilçiliyidir.
O qeyd edib ki, Türkiyənin müdafiə və aviasiya sənayesi ixracatı 2025-ci ildə 10 milyard dolları ötüb, yerli istehsal səviyyəsi isə 80 faizdən yüksək olub. Haluk Görgün Bakıda nümayiş etdirilən geniş iştirakın bu inkişafın nəticəsi olduğunu vurğulayıb.
Türk dövlətləri arasında müdafiə sənayesi əməkdaşlığı güclənir
ADEX 2026 çərçivəsində Türk Dövlətləri Təşkilatına üzv ölkələrin müdafiə sənayesi qurumları rəhbərlərinin ikinci görüşü də Bakıda keçiriləcək.
Görüşdə türk dünyasında müdafiə sənayesi sahəsində birgə istehsal, texnologiyaların inkişafı və əməkdaşlıq imkanları müzakirə olunacaq.
Türkiyə tərəfi bildirib ki, ötən il İstanbulda keçirilən IDEF sərgisi çərçivəsində ortaya qoyulan birgə istehsal iradəsi Bakıda konkret əməkdaşlıq yol xəritəsinə çevriləcək.
Azərbaycanda müdafiə sənayesi ekosistemi genişlənir
Azərbaycan və Türkiyə arasında müdafiə sənayesi əməkdaşlığı istehsal, texnologiya mübadiləsi, mühəndislik və yeni iş imkanlarının yaradılması istiqamətlərində inkişaf edir.
Azərbaycanda “Aselsan Bakı”, “Bayraktar Texnologiya Azərbaycan”, “Maşın və Kimya Azərbaycan” və “Türk Aerokosmik Sənayesi Azərbaycan Mühəndislik Ofisi” daxil olmaqla altı ortaq şirkət müdafiə sənayesinin müxtəlif sahələrində fəaliyyət göstərir.
“Türk Aerokosmik Sənayesi” şirkətinin “Hürkuş” təyyarəsinin bəzi hissələrinin Azərbaycanda istehsalı ilə bağlı yerli sənaye müəssisələri ilə müzakirələri də davam edir.
Haluk Görgün bildirib ki, bu inkişaflar Azərbaycan və Türkiyə arasında müdafiə sənayesi əməkdaşlığının inteqrasiya olunmuş tərəfdaşlıq modelinə çevrildiyini göstərir.
Onun sözlərinə görə, Azərbaycanda fəaliyyət göstərən ortaq şirkətlər istehsaldan texnologiya mübadiləsinə, mühəndislikdən məşğulluğa qədər geniş sənaye ekosistemi formalaşdırır.
Haluk Görgün ADEX 2026 sərgisinin Türkiyə müdafiə sənayesinin əldə etdiyi səviyyəni və Azərbaycan–Türkiyə strateji tərəfdaşlığının inkişaf mərhələsini nümayiş etdirəcəyini bildirib.
O, Azərbaycanla birlikdə istehsal və inkişaf istiqamətində əməkdaşlığın davam etdiriləcəyini vurğulayıb.
