Bakı,TurkicWorld
Türkiyənin ilk milli silahlı pilotsuz uçuş aparatı (SİHA) Bayraktar TB2-nin turbo mühərrikli və süni intellektlə təchiz edilmiş yeni versiyası Bayraktar TB2T-AI sınaq uçuşlarına davam edir.
TurkicWorld AzerVoice-a istinadən xəbər verir ki, Keşan rayonunda aparılan uçuş sınaqları Baykar şirkətinin yazılı açıqlaması ilə ictimaiyyətə təqdim olunub.
Yeni Bayraktar TB2T-AI, turbo mühərrik gücü, yüksək sürət və üstün hündürlük qabiliyyəti ilə dünyada öz sinfində lider olmaq iddiasını ortaya qoyur.
30 dəqiqədən az müddətdə 30 min futdan çox yüksəkliyə çata bilir. Son sınaqda 30.318 fut yüksəkliyə qalxaraq öz rekordunu yeniləyib.
Maksimum sürəti 160 düyün (təxminən 300 km/saat) olan Bayraktar, yüksək hündürlükdə də daha uzun müddət qala bilir.
Bayraktar TB2T-AI hava döyüşlərində avtonom üstünlüklər təqdim edir.
İnkişaf etdirilmiş süni intellekt sistemləri ilə hədəfləri analiz edə, aşkar edə və diaqnoz qoya bilir. Ən çətin elektron müharibə mühitlərində belə vizual naviqasiya apararaq ərazini tanıya və istiqamətini təyin edə bilir. Daha ağıllı uçuş marşrutları seçərək, dinamik şəkildə hədəflərinə uyğun hərəkət edir.
Bayraktar TB2T-AI süni intellektlə dəstəklənmiş sistemləri sayəsində, uçuş-enmə zolaqlarını vizual olaraq tanıyır və avtonom eniş icra edə bilir. Döyüş meydanında kritik vəziyyətlərdə avtomatik olaraq bazaya qayıtma xüsusiyyətinə sahibdir. Səmada fövqəladə vəziyyətlərə reaksiya verərək, əməliyyat təhlükəsizliyini maksimuma çatdırır.
Bayraktar TB2T-AI, süni intellektlə gücləndirilmiş yeni nəsil sistemləri ilə döyüş meydanında "oyun dəyişdirici" rol oynamağa hazırdır.
Daha sürətli qərarvermə prosesi ilə hava üstünlüyünü qoruyaraq, avtonom şəkildə hədəfləri izləyir və məhv edir.
Həmçinin, müasir hava döyüş taktikalarına uyğun adaptasiya olur.
Türkiyənin müdafiə sənayesində yeni bir mərhələ açan Bayraktar TB2T-AI, qlobal miqyasda pilotsuz hava döyüş platformalarının inkişafına liderlik etməyə davam edəcək.
