BAKI,TurkicWorld
İtaliyanın Augusta limanında CIF bazisi üzrə Azərbaycanın "Azeri Light" markalı neftinin qiyməti əvvəlki göstərici ilə müqayisədə 0,48 ABŞ dolları və ya 0,4 faiz artaraq bir barel üçün 120,02 ABŞ dollarına çatıb.
Bu barədə neft bazarı iştirakçılarının məlumatında bildirilib.
Qeyd olunub ki, Türkiyənin Ceyhan limanında FOB bazisi üzrə "Azeri Light" markalı neftin bir barelinin qiyməti 0,97 ABŞ dolları və ya 0,84 faiz azalaraq 114,58 ABŞ dolları təşkil edib.
"Urals" markalı xam neftin qiyməti əvvəlki göstərici ilə müqayisədə 0,74 ABŞ dolları və ya 0,81 faiz azalaraq bir barel üçün 90,53 ABŞ dollarına çatıb.
Şimal dənizində hasil edilən "Dated Brent" markalı neftin qiyməti isə əvvəlki göstərici ilə müqayisədə 1,75 ABŞ dolları və ya 1,45 faiz azalaraq bir barel üçün 118,56 ABŞ dolları olub.
Azərbaycanın 2026-ci il dövlət büdcəsində bir barel neftin orta qiyməti 65 ABŞ dolları səviyyəsində hesablanıb.
"Trading Economics"in məlumatına görə, xam neft cümə günü yüksəlişini dayandıraraq barreli təxminən 100 dollar səviyyəsində qərarlaşıb. Bildirilib ki, buna İran dövlət mediasının Tehranın Hörmüz boğazı ilə bağlı müzakirələr aparmaq üçün Omanla görüş keçirəcəyini bildirməsi səbəb olub.
"Körfəz Əməkdaşlıq Şurasına üzv ölkələrin diplomatlarının bazar ertəsi İran tərəfi ilə görüşərək boğazdan gəmiçiliyin idarə olunması üzrə mümkün müvəqqəti razılaşmanı müzakirə edəcəyi gözlənilir.
Qiymətlərə əlavə təzyiq göstərən amillər arasında ABŞ Enerji İnformasiya Administrasiyasının (EIA) 2027-ci il üzrə ABŞ-də xam neft hasilatı proqnozunu sutkada 14,3 milyon barelə yüksəltməsi də var. Bununla yanaşı, Beynəlxalq Enerji Agentliyi (IEA) qlobal neft tələbatı ilə bağlı proqnozunu kəskin şəkildə aşağı salaraq 2026-cı ildə sutkalıq tələbatın 2,5 milyon barel azalacağını proqnozlaşdırıb.
Bu arada, Çinin sentyabr ayında avqust ayındakı ilə təxminən eyni həcmdə xam neft idxal edəcəyi gözlənilir. Ölkənin neft alışları iyun ayında son on ilin ən aşağı səviyyəsinə düşdükdən sonra bərpa olunub.
Səudiyyə Ərəbistanı isə bir neçə hücumdan sonra ehtiyat tədbiri olaraq Şərq–Qərb neft kəmərinin fəaliyyətini dayandırıb. Bununla yanaşı, İranın dəstəklədiyi husilərin Yəmənin Perim adasında irəlilədiyi bildirilir.
Nəticədə neftin qiyməti həftə ərzində 9,7 faiz artıb", - məlumatda qeyd edilib.
