Bakı, TurkicWorld
İsrail ordusunun Qəzza zolağının müxtəlif bölgələrində həyata keçirdiyi son hücumlarda ən azı 13 fələstinli ölüb, çoxlu sayda fələstinli yaralanıb.
TurkicWorld AzerVoice-ə istinadən xəbər verir ki, bu barədə yerli mənbələr məlumat verib.
İsrail ordusunun Qəzza şəhərinin Et-Tuffah rayonunda Əş-Şurafa ailəsinə məxsus evi pilotsuz uçuş aparatı (PUA) ilə bombalaması nəticəsində 4 nəfər ölüb, çoxlu sayda fələstinli yaralanıb.
Qəzzanın şərqindəki Şucaiyye rayonunda İsrail ordusuna məxsus PUA-ların hədəfinə çevrilərək həyatını itirən 3 nəfər Əl-Ehli Baptist Xəstəxanasına gətirilib.
Şahidlərin sözlərinə görə, İsrail təyyarələri Qəzzanın qərbindəki Ər-Rimal rayonundakı Səlahəddin məktəbini də hədəfə alıb. Hücum nəticəsində bir nəfər ölüb, bir nəfər isə yaralanıb.
İsrail ordusunun Qəzzanın mərkəzindəki bir evə pilotsuz təyyarə ilə hücumundan sonra biri uşaq olan 3 nəfərin cənazəsi Əl-Əqsa Şəhidləri Xəstəxanasına gətirilib.
İsrailin Qəzza zolağının cənubundakı Rəfah şəhərinin şimalındakı Əz-Zuhur məhəlləsində bir camaatı hədəf alan hücumda iki fələstinli həyatını itirib.
İsrail qüvvələrinin Deyr əl-Belah və Xan Yunisdə bəzi kənd təsərrüfatı sahələrinə və fələstinlilərin evlərinə atəş açdığı da bildirilib.
Məlumat üçün qeyd edək ki, İsrailin 7 oktyabrdan bəri Qəzza zolağına təşkil etdiyi hücumlarda ən az 15 min 694-ü uşaq, 10 min 279-u qadın olmaqla 38 min 664 fələstinli həyatını itirib, 89 min 97 nəfəri yaralanıb.
Hafiz Rufizoğlu