Bakı. TurkicWorld:
Türkiyə, ABŞ, İsveç və İngiltərənin də olduğu 12 ölkənin qeyri-hökumət təşkilatları “Beynəlxalq Azadlıq Donanması” adı altında aprel ayının ortalarında Qəzzaya yardım göndərməyə hazırlaşır.
TurkicWorld AzerVoice-a istinadən xəbər verir ki, yardım təkcə maddi deyil, həm də mənəvi dəstək daşıyır.
Donanmada olanlar arasında jurnalistlər, sənətçilər, həkimlər və siyasətçilər də var.
Məlumata əsasən, donanmanın iştirakçıları arasında Türkiyədən İHH Humanitar Yardım Fondu və Mavi Mərmərə Dərnəyi də var.
Qeyd edək ki, Qəzzanın Səhiyyə Nazirliyi bildirir ki, Qəzzada 33 mindən çox fələstinli öldürülüb və 2,3 milyon əhalisinin əksəriyyəti evlərini tərk etmək məcburiyyətində qalıb.
Nazirlik öz sayında mülki şəxslər və döyüşçülər arasında fərq qoymur, lakin qadınların və uşaqların ölənlərin üçdə ikisini təşkil etdiyini bildirir.
İsrail dinc sakinlərin ölməsində HƏMAS-ı günahlandırır, çünki yaraqlılar sıx yaşayış məntəqələrində döyüşürlər.
İsrail heç bir sübut təqdim etmədən 13 min HƏMAS döyüşçüsü öldürdüyünü bildirib.
Bu arada Qəzzada döyüşlər davam edir. İsrailin Qəzzanın cənubunda BMT-nin fələstinli qaçqınlarla işləyən agentliyi olan UNRWA-nın qida paylama məntəqəsinə endirdiyi zərbə nəticəsində agentliyin bir əməkdaşı həlak olub, 22 nəfər yaralanıb.
UNRWA-nın məlumatına görə, son beş ayda gedən döyüşlər zamanı agentliyin həlak olan işçilərinin sayı 165-ə çatdırıb.
Qəzzanın səhiyyə orqanları UNRWA anbarının həyətinə endirilən zərbə nəticəsində ümumilikdə 5 nəfərin öldüyünü bildirib.
