BAKI,TurkicWorld,Yusif Şərifzadə
İsrail qüvvələri Livanın cənubunda son saatlarda bir sıra hərbi əməliyyatlar həyata keçirib. Livanın Milli Xəbər Agentliyinin məlumatına görə, sərhədyanı yaşayış məntəqələrinin bombalanması, evlərin partladılması və pilotsuz uçuş aparatları ilə zərbələr qeydə alınıb.
TurkicWorld xəbər verir ki, İsrail qüvvələri İsrail sərhədi yaxınlığında yerləşən Hula kəndində bombardman həyata keçirib. İlkin məlumatlara görə, hücum nəticəsində ölən və ya yaralanan olmayıb.
İsrail ordusunun Sur şəhəri bölgəsində Əl-Mənsuri və Məcdəl Zun yaşayış məntəqələri arasındakı ərazilərdə yerləşən evləri partlatdığı bildirilib.
Livanın Milli Xəbər Agentliyi İsrailə məxsus pilotsuz uçuş aparatının Əli ət-Tahir yüksəkliklərinə iki mərhələdə zərbələr endirdiyini də xəbər verib.
Bundan əvvəl İsrail qüvvələrinin Halta kəndinə basqın etdiyi və üç nəfəri saxladığı bildirilib. Həmin şəxslərin hansı səbəbdən saxlanıldığı hələlik məlum deyil.
İsrail qüvvələrinin Kəfr Təbnit yaşayış məntəqəsində də güclü partlayış törətdiyi bildirilir. Partlayışdan sonra ərazidə böyük tüstü buludlarının müşahidə edildiyi qeyd olunub.
Son hadisələr İsrailin Livanın cənubunda hərbi əməliyyatlarının davam etdiyini göstərir. Hücumların vurduğu maddi ziyanın miqyası barədə hələlik ətraflı məlumat açıqlanmayıb.
