BAKI,TurkicWorld,Vüsalə Əzimzadə
Qazaxıstan Prezidenti Kasım-Jomart Tokayev uzunmüddətli müşaviri Erlan Karinı ölkənin vitse-prezidenti təyin edib. Yeni vəzifə bu ilin əvvəlində qəbul edilən yeni Konstitusiya əsasında yaradılıb.
50 yaşlı Karin 2019-cu ildən, Tokayevin prezident vəzifəsinə başlamasından sonra onun əsas müşavirlərindən biri kimi fəaliyyət göstərib. Vitse-prezident vəzifəsinə təyin olunması ilə Karin Tokayevin mümkün varisi kimi birinci sıraya çıxıb.
Tokayev Karinı dövlət idarəçiliyi sahəsində geniş təcrübəyə malik peşəkar dövlət qulluqçusu kimi xarakterizə edib. Prezident onun uzun illər dövlət idarəetmə sistemində çalışdığını və geniş dünyagörüşünə malik olduğunu bildirib. Karin terrorla mübarizə sahəsində təcrübəyə malikdir və Tokayevin “Yeni Qazaxıstan” adlandırdığı siyasi ideologiyasının təşviqində əsas fiqurlardan biri olub.
Tokayev həmçinin 2024-cü ildən baş nazir vəzifəsini tutan Olcas Bektenovun yenidən bu vəzifəyə təyin olunmasını təklif edib. Hər iki təyinat Tokayev tərəfdarı olan “Adilet” partiyasının üstünlük təşkil etdiyi parlament tərəfindən təsdiqlənib.
73 yaşlı Tokayev yeni Konstitusiyaya əsasən daha bir yeddiillik prezidentlik müddətinə namizədliyini irəli sürə bilər. Onun hazırkı prezidentlik müddəti 2029-cu ildə başa çatır.
