BAKI,TurkicWorld
“Rolls-Royce” Səudiyyə Ərəbistanında yüksək sürətli mühərriklərin istehsalına lisenziya verən ilk istehsalçı olub. Şirkət yerli sənaye müəssisəsi “Makeen” ilə ölkədə “mtu Series 2000” dəniz mühərriklərinin istehsalı və yığılması barədə razılaşma imzalayıb.
TurkicWorld Arabaz-a istinadən xəbər verir ki, yeni razılaşma “Rolls-Royce” və “Makeen” arasında 2023-cü ilin noyabrında imzalanmış çərçivə lisenziya sazişinin davamıdır. Layihə çərçivəsində yüksək sürətli mühərriklərin istehsalının müəyyən mərhələləri Səudiyyə Ərəbistanında həyata keçiriləcək.
“mtu Series 2000” mühərrikləri sürətli bərələr, patrul gəmiləri, axtarış-xilasetmə vasitələri və heyət daşıyan gəmilər də daxil olmaqla müxtəlif dəniz nəqliyyat vasitələrində istifadə olunur. Bu mühərrik seriyasının gücü 1 939 kilovata qədər çatır.
Razılaşma Səudiyyə Ərəbistanının “2030 Baxışı” çərçivəsində yerli istehsalı genişləndirmək, qabaqcıl texnologiyaları ölkəyə gətirmək və daxili istehsal zəncirlərini inkişaf etdirmək strategiyasına uyğun həyata keçirilir.
“2030 Baxışı”nın 2025-ci il üzrə hesabatında bildirilirdi ki, yerli istehsalın genişləndirilməsinə yönəlmiş tədbirlərdən yararlanan fabriklərin sayı 2020-ci ildəki 3 900-dən çox göstəricidən 2025-ci ildə 6 700-dən yuxarı qalxıb.
“Rolls-Royce Power Systems” şirkətinin Mobil və Davamlı Həllər bölməsinin prezidenti Andreas Görtz bildirib ki, razılaşma “mtu” texnologiyalarının Səudiyyə Ərəbistanındakı yerli istehsal imkanları ilə birləşdirilməsinə şərait yaradacaq. Onun sözlərinə görə, bu əməkdaşlıq qabaqcıl texnologiyalara əsaslanan güclü yerli sənaye bazasının yaradılmasını dəstəkləyəcək.
Razılaşma çərçivəsində istehsal ediləcək mühərriklərin sürətli bərələr, sahil mühafizə gəmiləri və patrul katerləri də daxil olmaqla dəniz və hərbi-dəniz layihələrində istifadəsi nəzərdə tutulur. “Rolls-Royce” dəniz nəqliyyatı üçün yaradılan istehsal imkanlarının gələcəkdə dəmir yolu sahəsinə də genişləndirilməsinin planlaşdırıldığını bildirib.
“Makeen” şirkətinin baş icraçı direktoru Favaz əl-Sübeyti əməkdaşlığın yüksək sürətli mühərrik texnologiyalarının Səudiyyə Ərəbistanına gətirilməsinə, yerli istehsalın inkişafına və mütəxəssislərin hazırlanmasına imkan yaradacağını qeyd edib.
“Rolls-Royce”un Səudiyyə Ərəbistanındakı fəaliyyəti 1960-cı illərdən başlayır. Şirkətin mühəndislik texnologiyalarından ölkənin hava, dəniz və quru nəqliyyatı sahələrində istifadə olunur.
“Makeen” isə qabaqcıl texnologiyaların yerli istehsalını təşkil etmək və ölkənin sənaye imkanlarını genişləndirmək məqsədilə yeni istehsal güclərinə sərmayə yatırır. Növbəti mərhələdə tərəflər gələcək layihələrin həyata keçirilməsi üçün tələb olunan texniki və istehsal imkanlarının inkişafına diqqət yetirəcəklər.
