BAKI,TurkicWorld,Yusif Şərifzadə
İsrailin xarici işlər naziri Gideon Saar hökumətin Qəzza zolağında yaşayan 2,3 milyon fələstinlinin hamısını ərazidən çıxarmaq planının olmadığını bildirib.
TurkicWorld xəbər verir ki, Saar Sloveniyada keçirdiyi mətbuat konfransında fələstinlilərin öz iradələri ilə başqa ölkəyə köçmək istəmələri və onları qəbul etməyə hazır dövlətin olması halında İsrailin buna qarşı çıxmayacağını deyib.
O vurğulayıb ki, heç kəs öz iradəsinə zidd olaraq Qəzzadan çıxarılmayacaq.
Saarın açıqlaması İsrail hökumətindəki ifrat sağçı siyasətçilərin son günlərdə Qəzza əhalisinin ərazidən çıxarılmasının nəzərdə tutulduğuna dair bəyanatlarından sonra səslənib.
İsrailin milli təhlükəsizlik naziri İtamar Ben-Qvir cümə axşamı Qəzza əhalisinin “könüllü köç” yolu ilə ərazidən çıxarılmasını nəzərdə tutan yeddiillik plan açıqlayıb.
İsrailin müdafiə naziri İsrael Kats isə bundan əvvəl Qəzza üçün fələstinlilərin köçü olmadan “real həll”in mümkün olmadığını bildirib.
Saarın sözləri hökumətin rəsmi mövqeyi ilə kabinetdəki bəzi ifrat sağçı nazirlərin çağırışları arasında fərqin olduğunu göstərir.
Beynəlxalq hüquqa əsasən, işğal olunmuş ərazidə mülki əhalinin məcburi köçürülməsi Cenevrə konvensiyalarına əsasən hərbi cinayət hesab olunur.
Qəzza əhalisinin gələcəyi ilə bağlı müzakirələr İsrailin hərbi əməliyyatları, humanitar böhran və fələstinlilərin məcburi köçürülməsi ilə bağlı beynəlxalq narahatlıqlar fonunda davam edir.
