BAKI,TurkicWorld,Yusif Şərifzadə
İranın Bəsic qüvvələrinin rəhbəri Hüseyn Taib dünyada qüvvələr nisbətinin dəyişdiyini və ABŞ ilə İsrailin hazırda “ən zəif dövrlərindən birini” yaşadığını iddia edib. O, iranlıları Tehranla danışıqların mümkün bərpasına ehtiyatla yanaşmağa çağırıb.
TurkicWorld xəbər verir ki, Hüseyn Taib bu barədə İranın “Tasnim” xəbər agentliyinə açıqlamasında bildirib. Onun sözlərinə görə, qlobal güc xəritəsi dəyişir və əvvəlki beynəlxalq münasibətlər sistemi tədricən transformasiyaya uğrayır.
“Bu gün qlobal güc xəritəsi dəyişir. Artıq ABŞ-nin dünyanın, sionist rejimin isə bölgənin mərkəzi olduğu dövr deyil”, – Taib bildirib.
Bəsic rəhbəri Avropa ölkələrinin də Vaşinqtonla münasibətlərinin nəticələrini yenidən qiymətləndirməyə başladığını iddia edib. Onun fikrincə, Avropa ABŞ tərəfindən “alçaldıldığını” anlayıb və qitənin zəifləyən mövqeyi Tramp administrasiyasının milli təhlükəsizlik strategiyasında da özünü göstərir.
Taib İranın rəqiblərinin yenidən danışıqlar masasına qayıtmaq istiqamətində atdığı addımlara da toxunub. O, İran ictimaiyyətini danışıqların mümkün bərpasına həddindən artıq ümid bəsləməməyə çağırıb.
“İran xalqı danışıqlar masasına bu zahiri qayıdışa aldanmamalıdır”, – Taib deyib.
İran rəsmisi Tehranın rəqiblərini əvvəlki razılaşmalar üzrə öhdəliklərini yerinə yetirməməkdə ittiham edib. Onun sözlərinə görə, qarşı tərəf daha əvvəl götürdüyü öhdəliklərdən geri çəkilib və yenidən təzyiq siyasətinə qayıdıb.
Taib ABŞ və İsraildəki iqtisadi problemlərin də onların beynəlxalq və regional mövqelərinin zəifləməsinə təsir göstərdiyini iddia edib. O, mövcud dəyişikliklərin İranın rəqiblərinin üstünlüyünün azalmasının göstəricisi olduğunu bildirib.
