BAKI,TurkicWorld,Yusif Şərifzadə
İsrail hərbçiləri işğal altındakı İordan çayının qərb sahilində gecə və səhər saatlarında keçirdikləri reydlər zamanı azı 66 fələstinlini saxlayıblar.
TurkicWorld xəbər verir ki, ən genişmiqyaslı əməliyyat Nablusun cənubunda yerləşən Tal kəndində keçirilib. Wafa xəbər agentliyinin məlumatına görə, burada 30 nəfər saxlanılıb.
Digər əməliyyatlar zamanı Ramallah vilayətində 4, Cenin şəhərində 5, Hebron bölgəsində 8, Beytləhm şəhərində 3 və Tulkərm vilayətində 5 nəfər saxlanılıb.
Bundan əlavə, İsrail polisi işğal altındakı Şərqi Qüdsün cənub-şərqində yerləşən Əl-İzariyyə qəsəbəsinə reyd keçirib və bir nəfəri saxlayıb.
Məlumatda saxlanılan şəxslərə qarşı irəli sürülən ittihamlar və ya onların sonrakı hüquqi vəziyyəti barədə əlavə məlumat verilməyib.
İsrail rəsmiləri əməliyyatlarla bağlı hələlik rəsmi açıqlama yaymayıblar.
