BAKI,TurkicWorld,Yusif Şərifzadə
Hindistanın İrandakı səfirliyi ölkə vətəndaşlarına bölgədə təhlükəsizlik vəziyyəti yaxşılaşana qədər İrana səfərləri təxirə salmağı tövsiyə edib. Səfirlik İranda olan hindistanlılardan mümkün imkanlardan istifadə edərək ölkəni müvəqqəti tərk etməyi nəzərdən keçirmələrini istəyib.
TurkicWorld xəbər verir ki, Hindistan səfirliyinin açıqlamasında son günlər bölgədə artan gərginlik səbəbindən səyahət planlarının təxirə salınmasının məqsədəuyğun olduğu bildirilib. Səfirlik İranda yaşayan və ya səfərdə olan Hindistan vətəndaşlarını təhlükəsizlik tədbirlərinə əməl etməyə çağırıb.
Bu çağırış ABŞ və İran arasında qarşılıqlı hərbi əməliyyatların davam etdiyi bir vaxtda verilib. Məlumata görə, ABŞ qüvvələri İrana qarşı ardıcıl doqquzuncu gün zərbələr endirib.
Gərginlik xüsusilə Hörmüz boğazı ətrafında artır. İran iki neft tankerinin partladığını və hərəkətsiz qaldığını açıqladıqdan sonra bölgədə dəniz nəqliyyatı və enerji daşımaları ilə bağlı narahatlıqlar daha da güclənib.
ABŞ və İran arasında artan qarşıdurma ötən ay imzalanmış müvəqqəti atəşkəs razılaşmasının pozulmasından sonra daha da kəskinləşib. Qarşıdurma Hörmüz boğazına nəzarət uğrunda mübarizəni dərinləşdirib, enerji təchizatında problemlər yaradıb və qlobal qiymət artımı ilə bağlı narahatlıqları artırıb.
