BAKI,TurkicWorld,Yusif Şərifzadə
Körfəz Əməkdaşlıq Şurasının baş katibi Casim Məhəmməd əl-Budeyvi İranın Bəhreyn, Küveyt və İordaniyaya son hücumlarını pisləyərək mülki obyektlərin və mühüm infrastrukturun qəsdən hədəfə alınmasını hərbi cinayət adlandırıb.
TurkicWorld xəbər verir ki, əl-Budeyvi Körfəz Əməkdaşlıq Şurasının Baş Katibliyi tərəfindən yayımlanan bəyanatında İranın hərəkətlərinin son dərəcə təhlükəli gərginləşmə olduğunu bildirib. Onun sözlərinə görə, hücumlar beynəlxalq hüququn və Birləşmiş Millətlər Təşkilatının Nizamnaməsinin ciddi şəkildə pozulmasıdır.
Baş katib qeyd edib ki, infrastrukturun, həyati əhəmiyyət daşıyan qurğuların və mülki obyektlərin qəsdən hədəfə alınması beynəlxalq məsuliyyət və cinayət təqibi tələb edən hərbi cinayətlər təşkil edir.
Əl-Budeyvi İranı bütün beynəlxalq qayda və sazişləri açıq şəkildə pozmaqda, regionda təhlükəsizlik və sabitliyi sarsıtmaq istiqamətində davamlı siyasət yürütməkdə ittiham edib.
Körfəz Əməkdaşlıq Şurasının bəyanatında Bəhreyn, Küveyt və İordaniyanın suverenliyinə, təhlükəsizliyinə və ərazi bütövlüyünə tam dəstək ifadə olunub. Təşkilat əvvəlki açıqlamalarında da həmin ölkələrə qarşı hücumları dövlətlərin suverenliyinin kobud şəkildə pozulması kimi qiymətləndirib.
Əl-Budeyvi beynəlxalq ictimaiyyəti hücumlara qarşı qəti mövqe göstərməyə və mülki infrastrukturun hədəfə alınmasına görə İranın məsuliyyətə cəlb edilməsi üçün tədbirlər görməyə çağırıb.
Son hücumlar zamanı Küveytdə suyun duzsuzlaşdırılması müəssisəsi, hava limanı və neft obyektləri daxil olmaqla bir sıra mühüm qurğuların zərər gördüyü bildirilir.
