BAKI,TurkicWorld,Yusif Şərifzadə
ABŞ-ın yeni hava hücumları İranın qərbində, İraq və Küveyt sərhədlərinə yaxın ərazilərə yönəlib. Hücumlar Xuzistan vilayətində yerləşən Abadan və Məhşəhr şəhərlərinə həyata keçirilib.
TurkicWorld xəbər verir ki, Xuzistan vilayətinin qubernator müavini Vəliullah Həyati dövlət xəbər agentliyi İRNA-ya açıqlamasında Abadan və Məhşəhr şəhərlərinin zərbələrə məruz qaldığını bildirib.
Məlumata görə, hücuma məruz qalan Abadan şəhərində Yaxın Şərqin ən qədim neft emalı zavodlarından biri yerləşir. Məhşəhr isə mühüm liman şəhəri hesab olunur.
İranın Fars xəbər agentliyinin məlumatına əsasən, Məhşəhr şəhərinə zərbə yerli vaxtla saat 13:30 radələrində endirilib. Təxminən beş dəqiqə əvvəl isə Abadan şəhərinin hədəfə alındığı bildirilib.
Hücumların bölgədə ABŞ və İran arasında davam edən qarşıdurma çərçivəsində həyata keçirildiyi qeyd olunur.
Abadanın enerji infrastrukturu baxımından strateji əhəmiyyəti var. Şəhərdə yerləşən neft emalı zavodu İranın enerji sektorunda mühüm rol oynayır.
Məhşəhr limanı isə İranın ixrac və dəniz ticarəti imkanları baxımından əhəmiyyətli məntəqələrdən biri hesab olunur.
