BAKI,TurkicWorld,Yusif Şərifzadə
Bəhreyn ordusu ölkənin hava hücumundan müdafiə sistemlərinin İran tərəfindən həyata keçirildiyi bildirilən raket və pilotsuz uçuş aparatı hücumlarını dəf etdiyini açıqlayıb. Manama hökuməti İranı mülki əhalini və şəxsi mülkiyyəti hədəfə almaqda ittiham edib.
TurkicWorld xəbər verir ki, Bəhreyn Silahlı Qüvvələrinin yaydığı açıqlamada bütün hərbi bölmələrin ölkənin təhlükəsizliyini təmin etmək məqsədilə yüksək hazırlıq vəziyyətinə gətirildiyi bildirilib. Əhaliyə naməlum qalıqlara yaxınlaşmamaq və belə hallarda dərhal aidiyyəti qurumlara məlumat vermək barədə xəbərdarlıq edilib.
Bəhreyn ordusu səhər saatlarında ölkə ərazisinə qarşı həyata keçirildiyi bildirilən “bir neçə hücumu” pisləyib. Açıqlamada bu hücumların təhlükəli xarakter daşıdığı qeyd olunub.
Bəhreyn qüvvələrinin yüksək döyüş hazırlığı vəziyyətində olduğu bildirilib. Ordunun açıqlamasında hərbçilərin ölkənin müdafiəsi istiqamətində üzərlərinə düşən vəzifəni yerinə yetirmək üçün yüksək sayıqlıq nümayiş etdirdikləri vurğulanıb.
Hadisə Körfəz bölgəsində artan hərbi gərginlik fonunda baş verib. Bəhreyn ABŞ-ın bölgədəki əsas tərəfdaşlarından biri hesab olunur və ölkədə mühüm hərbi obyektlər yerləşir.
Ekspertlər bildirirlər ki, Körfəz ölkələrinə qarşı mümkün hücumlar regional təhlükəsizlik vəziyyətini daha da mürəkkəbləşdirə və enerji marşrutları ilə bağlı narahatlıqları artıra bilər.
